Zelensky pastron radhët nga ndikimi rus mes fazës vendimtare të luftës

Presidenti ukrainas Volodymyr Zelensky ka nënshkruar një dekret për heqjen e shtetësisë ukrainase ndaj disa individëve që dyshohet se zotërojnë pasaportë ruse.

Një nga emrat më të përfolur në këtë listë është ai i kryetarit të Bashkisë së Odesës, Gennady Trukhanov. Lajmi u konfirmua pas një mbledhjeje të nivelit të lartë mbi situatën e sigurisë në Ukrainë, ku Kreu i Shërbimit të Sigurisë, Vasyl Malyuk, raportoi për prani të rrjeteve të inteligjencës ruse dhe bashkëpunëtorëve të tyre në rajonet jugore dhe afër vijës së frontit.

Pas shpalljes së dekretit, Trukhanov është parë në publik pranë ndërtesës së Këshillit të Qytetit të Odesës, ku u përball me pyetjet e qytetarëve dhe aktivistëve lokalë.

Në një video të publikuar nga qytetarja Vera Zaporozhets, ai shprehet se dokumenti mbi të cilin është bazuar vendimi për heqjen e shtetësisë është një “falsifikim i pastër” dhe mohoi kategorikisht se kishte pasur ndonjëherë pasaportë ruse.

"Vërtet. Mund ta shihni që këto janë falsifikime të pastra. Nuk kishte pasaportë", tha Trukhanov, ndërsa theksoi se nuk ka ndërmend të largohet nga Ukraina apo nga qyteti i Odesës.

“Kam mbështetjen e shumicës së qytetarëve”, shtoi ai, duke lënë të kuptohet se vendimi për heqjen e shtetësisë ka motive politike dhe lidhet me zgjedhjet e ardhshme lokale. 

Ndërkohë, burime mediatike bëjnë me dije se, përveç Trukhanovit, shtetësia ukrainase i është hequr edhe balerinit me famë ndërkombëtare Sergei Polunin, si dhe Oleg Tsaryov, ish-deputet i Partisë Popullore të Ukrainës, i cili më parë është dënuar në mungesë për tradhti.

Kriza e shtetësisë vjen në një periudhë tensioni të lartë në Ukrainë, ku lufta me Rusinë ka hyrë në një fazë vendimtare dhe autoritetet po rishikojnë me kujdes çdo rast që mund të përbëjë rrezik për sigurinë kombëtare.

Në këtë kontekst, vendimet e fundit të presidentit Zelensky duken të fokusuara në parandalimin e ndikimit rus në strukturat politike dhe institucionale të vendit.

Ndërsa reagimet ndërkombëtare për këtë çështje ende mungojnë, Kremlini ka komentuar në një tjetër zhvillim politik: zëdhënësi Dmitry Peskov iu përgjigj kërcënimeve të fundit nga presidenti francez Emmanuel Macron, duke deklaruar se Rusia është ende e hapur për një zgjidhje paqësore, por nuk do të heqë dorë nga interesat e saj strategjike.

Në një klimë të tillë politike, çështja e shtetësisë së Trukhanovit mund të shndërrohet në një provë serioze për balancën ndërmjet sigurisë kombëtare dhe të drejtave individuale në Ukrainën e kohës së luftës.