Bild: BE po shqyrton ndalesën e plotë të cigareve me filter

Bashkimi Evropian dëshiron të ndalojë cigaret me filtra dhe produktet elektronike të duhanit, shkruan gazeta gjermane Bild, e cila ka siguruar një projekt-rezolutë nga Këshilli i Bashkimit Evropian për një takim të Organizatës Botërore të Shëndetësisë (OBSH) në nëntor të këtij viti.

Në draft, Këshilli i BE-së deklaron se një raport nga një grup pune i OBSH-së mbi rregullimin e produkteve të duhanit rekomandon fuqimisht ndalimin e filtrave në mënyrë që të zvogëlojë atraktivitetin dhe shijen e cigareve, transmeton KP.

Këshilli i BE-së e mbështet këtë rekomandim të OBSH-së. "Një ndalim i prodhimit, importit, shpërndarjes dhe shitjes së cigareve me filtra do të jepte një kontribut të rëndësishëm në uljen e konsumit të duhanit", thotë ai.

Rekomandimet e këtij lloji nga Këshilli i BE-së kanë implikime të rëndësishme për rregullimin e ardhshëm të duhanit në BE - duke përfshirë një rishikim të të ashtuquajturës "Direktivë për produktet e duhanit". Kjo mund të përfshijë ndalime të produkteve.

Me qëllim uljen e konsumit dhe varësisë nga duhani dhe nikotina, BE-ja po shqyrton madje një ndalim të shitjeve në dyqane, stacione benzine dhe kioska, sipas gazetës gjermane.

Sipas Bild, përfaqësuesit e qeverisë gjermane "mirëpritën" ndalimin e cigareve me filtër në takimin e Grupit të Punës për Shëndetin Publik të Këshillit të BE-së më 9 tetor. Një zëdhënëse e Ministrisë Federale të Shëndetësisë tha për gazetën gjermane se qëndrimi i përbashkët i BE-së është ende "në proces harmonizimi".

Gazeta austriake "Kronen-Zeitung" raportoi më parë se Komisioni Evropian gjithashtu mbështet një ndalim.

Qëllimet e BE-së janë të mbrojë mjedisin dhe shëndetin e njeriut, dhe siç pretendojnë ata, "ndalimet do të ishin një hap i rëndësishëm drejt zbatimit të një direktive të OBSH-së që synon mbrojtjen e ujërave nëntokësore dhe tokës, si dhe promovimin e shëndetit të njeriut".

Organizata Botërore e Shëndetësisë do të mbajë konferencën e saj për kontrollin e duhanit në Gjenevë nga 17 deri më 22 nëntor.