Jordan Pickford rinovon me Evertonin deri në vitin 2029

Evertoni ka konfirmuar zyrtarisht se portieri anglez, Jordan Pickford, ka firmosur një kontratë të re afatgjatë me klubin, duke zgjatur qëndrimin e tij në “Goodison Park” deri në vitin 2029.

Numri 1 i kombëtares së Anglisë është tashmë i lidhur me “Toffees” për edhe katër vite të tjera, çka mund ta çojë periudhën e tij në klub deri në 12 vite gjithsej.

“Jam shumë i lumtur,” – deklaroi Pickford në faqen zyrtare të Evertonit. – “I lumtur që gjithçka u realizua. Janë edhe dy vite shtesë, pra katër vite gjithsej. Jam i emocionuar, sepse kjo më jep mundësinë të ndërtoj një trashëgimi këtu, të ecim përpara dhe ta çojmë klubin aty ku duam ta shohim.

Evertoni është një klub shumë i veçantë për mua. Duke ardhur nga Sunderland-i si një djalosh i ri dhe duke u bërë burrë këtu, ka qenë një periudhë e veçantë si për mua, ashtu edhe për familjen time.

Mendoj se të gjithë e kanë parë ndryshimin dhe zhvillimin tim me kalimin e viteve, por unë mbetem po ai djalë që e do të mbajë topin jashtë rrjetës. Është Evertoni që më ka ndihmuar të zhvillohem, dhe pas gjithë kësaj qëndron shumë punë e madhe.

Gjithmonë e kam ndier si diçka natyrale lidhjen me këtë klub, me tifozët dhe pasionin e tyre. Është diçka e veçantë, e pakrahasueshme, që më motivon jashtë mase. Ka qenë një udhëtim i jashtëzakonshëm deri tani.”

Që prej mbërritjes së tij nga Sunderland-i në vitin 2017, në një transferim rekord britanik për një portier, Jordan Pickford ka zhvilluar 326 ndeshje me Evertonin, duke u bërë një prej figurave më të qëndrueshme të klubit gjatë viteve të fundit.