Milani reagon ashpër për Pulisiç

Në një periudhë të ndërlikuar për Milanin, që po përballet me mungesa dhe probleme fizike pas ndeshjeve të kombëtareve, vjen më në fund një lajm i mirë për Masimiliano Alegrin.

Mesfushori belg Aleksis Salemaekers po shëron më shpejt se sa pritej nga dëmtimi muskulor i pësuar gjatë grumbullimit me përfaqësuesen e Belgjikës dhe mund të jetë në dispozicion për ndeshjen e fundjavës kundër Fiorentinës.

Belgu, i cili është shndërruar në një element të pazëvendësueshëm në krahun e djathtë, ka reaguar pozitivisht ndaj trajtimit dhe testet e fundit kanë dhënë sinjale inkurajuese.

\Stafi mjekësor i Milanit, megjithatë, kërkon kujdes maksimal për të shmangur përsëritjen e dëmtimit, ndaj mund të vendoset që ai të nisë ndeshjen nga stoli. Nëse Salemaekers do të rikthehet në fushë, Alegri do të marrë frymë më lirshëm, pasi mungesat kanë krijuar një boshllëk të ndjeshëm në krahët e mesfushës.

Ndërkohë, mbetet për t’u vlerësuar edhe gjendja e Adrien Rabiot, që po përballet me një problem në pulpë dhe mund të mungojë për disa ditë. Situata më e tensionuar, megjithatë, lidhet me Kristian Pulisiç.

Milani është i zemëruar me Federatën Amerikane të Futbollit, pasi lojtari u aktivizua në ndeshjen e parë me SHBA-në ndonëse nuk ishte në formë optimale, dhe u detyrua të largohej pas vetëm gjysmë ore loje në takimin e dytë. Ky menaxhim i gabuar, sipas klubit kuqezi, e ka përkeqësuar gjendjen fizike të lojtarit. Tashmë, në Milanelo po priten rezultatet e analizave për të kuptuar nëse Pulisiç mund të rikthehet për sfidën me Fiorentinën.

Në rast negativ, Alegri do të duhet të improvizojë me Leaon ose Nkunku në atë pozicion.

Ndërkohë, për trajnerin, rikuperimi i Salemaekers është më shumë sesa një lajm i mirë — është një sinjal shprese për të rimarrë ekuilibrin taktik që i ka munguar skuadrës. Në një moment ku çdo ndeshje vlen shumë për objektivat sezonalë, Milani kërkon stabilitet dhe qartësi, ndërsa stafi teknik synon të shmangë çdo rrezik për përkeqësim të situatës.

Nëse belgu do të jetë në gjendje të luajë të dielën, ai mund të bëhet “arma sekrete” e Alegrit për të rikthyer energjinë dhe disiplinën taktike në krahun e djathtë. Për kuqezinjtë, që po luftojnë në disa fronte, çdo rikuperim i tillë është si një fitore më vete.