Moderatori i një programi hetimor italian sulmohet me bombë pranë Romës

Një gazetar i njohur italian hetimor, Sigfrido Ranucci, u sulmua me një bombë që pothuajse shkatërroi makinën e tij dhe shkaktoi dëme në shtëpinë e një fqinji, raporton Guardian.

Shpërthimi ndodhi rreth 20 minuta pasi u kthye në shtëpinë e tij në Campo Ascolano, afër Romës. Makina e vajzës së tij gjithashtu u dëmtua pjesërisht. Askush nuk u lëndua dhe policia anti-mafia në Romë ka hapur hetim.

Sipas raportimeve, bomba, e mundshme e bërë nga fishekzjarr, ishte vendosur midis dy vazoresh jashtë shtëpisë me një fitil të ndezur. Ranucci, i cili ka qenë nën mbrojtje policore për vite për shkak të kërcënimeve të mëparshme, tha se shpërthimi ishte kaq i fuqishëm sa mund të kishte vrarë një kalimtar.

Pamjet e postuara nga Report treguan metale të shtrembëruara dhe xhama të thyer. Ranucci tha se kishte marrë shumë kërcënime, gjë që e bën të vështirë të gjurmohet autori i sulmit.

Sulmi vjen ndërsa ai ka hetuar ministra qeveritarë dhe ka kritikuar ndërhyrjet e dyshuara politike në Rai nga administrata e Giorgia Melonit; disa anëtarë të koalicionit të saj kanë paditur Report. Meloni e dënoi incidentin si “një akt serioz intimidimi”, ndërsa liderja opozitare Elly Schlein e quajti “sulm ndaj demokracisë dhe lirisë së informacionit”.

Ministri i Brendshëm Matteo Piantedosi tha se siguria e Ranuccit do të rritet në nivelin maksimal. Autoriteti për media Agcom dhe sindikata Fiom e dënuan sulmin si një “akt mizor” të nxitur nga një “klimë urrejtjeje”.

Ranucci, i cili ka shkruar një libër për mafinë italiane, ka treguar më 2021 se banditët kishin dhënë urdhër për ta vrarë, por atentati u ndalua, transmeton KosovaPress.

Të dielën, ai njoftoi temat kryesore të sezonit të ri të Report, duke përfshirë hetime mbi ’Ndrangheta në Kalabri dhe Cosa Nostra në Sicili.