Reali do ta lë yllin e tij të largohet falas në fund të sezonit

Real Madrid pritet ta lë të largohet Antonio Rüdigerin në fund të sezonit 2025–26, sipas raportimeve nga Gjermania.

Rüdiger, 32 vjeç, iu bashkua gjigantit spanjoll në vitin 2022 si lojtar i lirë nga Chelsea dhe ka zhvilluar tre sezone mbresëlënëse në “Santiago Bernabéu”.

Qendërmbrojtësi gjerman ka qenë një figurë kyçe për “Los Blancos”, duke luajtur në 157 ndeshje dhe duke fituar tetë trofe, por këtë sezon ka rënë nga planet e trajnerit Xabi Alonso.

Sipas gazetës “BILD”, kontrata e Rüdiger, e cila skadon në fund të sezonit, nuk do të rinovohet.

Alonso thuhet se nuk është plotësisht i bindur për qëndrueshmërinë dhe nivelin fizik të mbrojtësit, i cili ka pasur disa dëmtime të vogla gjatë viteve të fundit.

Aktualisht, Rüdiger është jashtë fushës për shkak të një lëndimi në kofshë që e pësoi në fillim të shtatorit dhe pritet të rikthehet në nëntor.

Në mungesën e tij, Éder Militão dhe Dean Huijsen janë bërë dyshe titullare në qendër të mbrojtjes, duke bindur plotësisht teknikun spanjoll.

Një tjetër faktor është paga e lartë e gjermanit, mbi 10 milionë euro në sezon, e cila shihet si e tepruar për një lojtar që tashmë konsiderohet rezervë.

Raportimet për largimin e tij vijnë disa muaj pas një incidenti në stërvitje me bashkëlojtarin Jude Bellingham, gjatë një periudhe të vështirë për Realin, që përfundoi sezonin e kaluar në vendin e dytë në La Liga dhe u eliminua në çerekfinale të Ligës së Kampionëve.

Sipas “El Chiringuito”, tensionet shpërthyen pas një ndërhyrjeje të ashpër të Rüdiger ndaj Bellingham në një ndeshje të vogël stërvitore, ku anglezi reagoi me fjalë, duke detyruar shokët e skuadrës të ndërhynin. Megjithatë, situata u zgjidh më vonë.

Përveç Realit dhe Chelseat, Rüdiger ka luajtur edhe për Stuttgart dhe Romën, ndërsa me kombëtaren gjermane ka regjistruar 81 paraqitje.

Aktualisht, Real Madrid kryeson La Ligën me shtatë fitore në tetë ndeshje, dhe ka nisur mbarë edhe në Ligën e Kampionëve me dy fitore radhazi.

Madrilenët do të përballen me Getafen të dielën, përpara se të presin Juventusin në ndeshjen e radhës evropiane të mërkurën.