Inter, start i shkëlqyer i trajnerit Chivu: tejkalon Mourinho-n dhe Inzaghi-n

Marrja e drejtimit të Interit pas një sezoni të vështirë nuk ishte e lehtë, sidomos për një trajner pa eksperiencë në nivele të larta.

Megjithatë, Cristian Chivu pati nevojë për vetëm pesë muaj për t’i bindur të gjithë: nga lojtarët, të cilët ndihen “rinovuar”, deri te tifozët, të cilët fillimisht e pritën me skepticizëm. Rezultatet në fushë kanë rikthyer besimin dhe dashurinë për ish-mbrojtësin rumun.

Me fitoren e fundit në Bruksel ndaj Union Saint-Gilloise, Interi regjistroi fitoren e shtatë radhazi në të gjitha kompeticionet. Në 10 ndeshjet e para në Serinë A dhe Champions, Chivu ka arritur një mesatare prej 2,4 pikësh për ndeshje, me 8 fitore dhe 2 humbje, duke tejkaluar fillimet e trajnerëve legjendarë si Jose Mourinho dhe Simone Inzaghi.

Vetëm Luciano Spalletti ka pasur një start më të mirë në epokën e Serisë A me 20 skuadra, ndërsa Leonardo gjithashtu arriti 24 pikë në 10 ndeshjet e para kur mori drejtimin e klubit në janar 2011.

Pas udhëtimit në Romë dhe Bruksel, Chivu do të përballet me sfidën e Napolit, duke treguar se nuk ka ndërmend të ndalojë ritmin e tij të suksesshëm. Me këtë fillim të shkëlqyer, ai po ndërton gradualisht rrugën për t’u shkruar gjithnjë e më shumë në historinë e Interit.