Barazimi ndaj Pizës, Alegri nuk e bën dramë

Në prag të ndeshjes me Pizën, Masimiliano Alegri e kishte përshkruar takimin si një sfidë e vështirë, “si kur ndjen një milje larg se diçka po digjet”. Pas barazimit 2-2 në shtëpi, trajneri i Milanit nuk kishte gabuar. Rezultati, megjithatë, nuk e kënaq plotësisht, sidomos duke marrë parasysh që Pisa është një nga skuadrat e sapo-ngjitura, ndaj të cilave Milani kishte fituar vetëm një pikë në dy takime gjatë sezonit.

Megjithatë, Alegri ruan qetësi dhe e sheh situatën nga ana pozitive: “Na vjen keq për rezultatin sepse dëshironim të fitonim, por në fund do të na sjellë avantazhe, sepse e kemi rikuperuar. Megjithatë, disa ndeshje duhet të menaxhohen ndryshe.”

Sipas tij, pikët e humbura nuk janë katastrofë: “Kur del nga këto ndeshje, të vjen keq për pikët e humbura, por në fund të sezonit kjo pikë do të jetë e rëndësishme.”

Jo gjithçka ishte pozitive: “Jemi të kënaqur që morëm barazimin në fund. Sonte kemi gabuar dhe duhet të reflektojmë, të punojmë mbi gjërat që nuk shkuan mirë”, vazhdoi Alegri.

“Kur ishim në avantazh, duhej të shënonim të dytin, por ishim shumë të hapur: dy sulmuesit ishin larg mesfushorëve dhe kishte shumë boshllëqe në mes të fushës. Pas golit të parë nuk mbetëm të bashkuar dhe u shtrijuam.

Në pesë minutat e fundit ka dy gjëra që duhen përmirësuar: në atë moment mjaftojnë dy aksione për të fituar ndeshjen, por nuk duhet të humbasësh kokën dhe të rrezikosh, sepse Pavlovic, për shembull, duhej të ndiqte Nzolën e lirë drejt portës.”

Probleme po shfaqen kur Milani ndeshet me ekipe që mbrojnë ulët: “Është çështje rritjeje, të kuptosh momentet e ndeshjes. Kur ishim në avantazh duhej të ishim më të qartë dhe më të shpejtë. Pisa luajti një ndeshje të mirë, duke shfrytëzuar mangësitë tona.

Kur ata kishin topin, ne hapeshim shumë dhe nuk duhej ta lejonim. Pas golit të parë ishte momenti për të dyfishuar avantazhin; kemi pasur situata në zonë ku mund të ishim më të qartë. Për këtë duhet të punojmë dhe të përmirësohemi.”