Grabitja në Luvër punë e brendshme? Hajdutët u ndihmuan nga një roje sigurie

Një punëtor në Luvër u dha informacion hajdutëve, të cilët vodhën xhevahiret e Francës me vlerë 100 milionë dollarë, sipas detektivëve francezë, të cilët tani besojnë se grabitja e guximshme ishte një punë e brendshme.

Provat digjitale mjeko-ligjore treguan se një anëtar i sigurisë në Luvër ishte në kontakt me individë që mendohet të jenë autorët e krimit përpara grabitjes së 19 tetorit.

“Ekzistojnë prova digjitale mjeko-ligjore që tregojnë se ka pasur bashkëpunim midis njërit prej rojeve të sigurisë së muzeut dhe hajdutëve”, kishte deklaruar një burim në mënyrë anonime.

“Informacione të ndjeshme u transmetuan në lidhje me sigurinë e muzeut, dhe kjo është mënyra se si ata ishin në dijeni të shkeljes.”

Hajdutët arritën të hynin dhe të dilnin nga muzeu brenda vetëm pak minutash duke përdorur një ballkon të katit të dytë që nuk u regjistrua nga kamerat e sigurisë — dhe u larguan me motorë me tetë xhevahire.

Edhe pse hetuesit me sa duket po i afrohen kapjes së hajdutëve, ata nuk janë optimistë për rikuperimin e bizhuterive, të cilat ka të ngjarë të jenë thyer dhe shitur.

Ndryshe, pas grabitjes tronditëse, xhevahiret më të çmuara kombëtare të ruajtura në Luvër u transferuan në Bankën e Francës.