Lojtarët e Flamurtarit dhe Vllaznisë nderojnë 17-vjeçarin që humbi jetën tragjikisht

Ndeshja mes Flamurtarit dhe Vllaznisë nisi me një moment emocioni të madh në stadiumin e Vlorës.

Para fillimit të takimit, të dy skuadrat zhvilluan një homazh prekës në kujtim të 17-vjeçarit Leonardo Shametaj, i cili humbi jetën një ditë më parë pas një aksidenti tragjik në qytet.

Në tribunën ku ishin vendosur tifozët vlonjatë, u shfaq fotografia e të ndjerit, ndërsa atmosfera u mbush me respekt e ndjenjë dhimbjeje.

Futbollistët e të dy ekipeve u afruan përpara tribunës dhe vendosën nga një trëndafil të bardhë pranë fotos së tij, si shenjë nderimi dhe solidariteti me familjen e të riut.

Ndërkohë, tifozët e pranishëm në stadium u ngritën në këmbë, duke duartrokitur gjatë në një moment heshtjeje që preku zemrat e të gjithëve.

Leonardo Shametaj, një adoleshent i dashur dhe punëtor, po kthehej në shtëpi me motomjetin e tij pas përfundimit të punës rreth mesnatës, kur u përplas fatalisht nga një automjet tip Porsche që udhëtonte me shpejtësi.

Ky gjest i futbollistëve dhe tifozëve të Flamurtarit e Vllaznisë tregoi edhe një herë se sporti di të bashkojë njerëzit përtej rivaliteteve, në momente kur dhimbja dhe solidariteti bëhen më të forta se çdo rezultat.