Cristiano Ronaldo Jr nis rrugëtimin me Portugali U-16

Cristiano Ronaldo Jr, djali i madh i ‘yllit’ të futbollit Cristiano Ronaldo, ka debutuar të enjten me Kombëtaren U-16 të Portugalisë, në Kupën e Federatave, turne që zhvillohet nga 30 tetori deri më 4 nëntor. Ky është një hap i rëndësishëm në rrugën e tij drejt futbollit profesionist, ndërsa ai synon të ecë në gjurmët e babait të tij.

Ashtu si Cristiano Ronaldo, edhe “Cristianinho” aktivizohet tek Al Nassr, ku luan me ekipet e të rinjve që prej vitit 2023.

Synimi i tij është i qartë: të arrijë deri te skuadra e parë e klubit saudit dhe, pse jo, të ndajë fushën me babanë e tij. Ronaldo, aktualisht 40 vjeç dhe me kontratë deri në qershor 2027, atëherë kur i biri do të jetë 17 vjeç, ka hapur derën për mundësinë e këtij momenti historik.

“Do të më pëlqente të luaja me të, por kjo nuk është diçka që më shqetëson. Do të shohim. Kjo varet më shumë nga ai se nga unë. Vitet kalojnë dhe një ditë do të duhet të ndalem,” ka thënë disa herë Cristiano Ronaldo.

Ronaldo Jr shquhet si sulmues i fortë fizikisht, i shpejtë dhe teknik, që pëlqen të nisë aksionet nga e majta, një profil i ngjashëm me fazat e hershme të babait të tij. Cristiano ka folur shpesh me krenari për të birin: “Ai është shumë konkurrues, si unë kur isha i vogël. Nuk i pëlqen të humbasë. Ka trup të mirë, është i shpejtë, teknik dhe godet mirë topin. Unë gjithmonë do ta mbështes.”

Në një epokë ku mbiemri mund të kthehet në presion, Ronaldo siguron se djali i tij do të zgjedhë rrugën e vet, por ëndrra për t’i parë të dy së bashku në një fushë futbolli, tashmë nuk tingëllon aspak e pamundur. Nëse zhvillimi i Cristiano Jr vazhdon me të njëjtin ritëm, futbolli mund të bëhet dëshmitar i një momenti të paprecedentë: një baba dhe bir që luajnë krah për krah në nivel elitar.