Liverpooli humb për gjashtë javë ‘yllin’ holandez

Jeremie Frimpong do të mungojë më gjatë nga sa ishte parashikuar fillimisht, duke u kthyer në një shqetësim të madh për Liverpoolin.

Mbrojtësi i djathtë holandez u dëmtua në ndeshjen e fituar 5-1 ndaj Eintracht Frankfurtit dhe raportet e para sugjeronin se mund të rikthehej në mesin e nëntorit.

Megjithatë, një përditësim i fundit nga Merseyside ka konfirmuar se Frimpong pritet të qëndrojë jashtë fushave për deri në gjashtë javë, me fillimin e dhjetorit që shihet si afati më realist për rikthimin e tij.

Kjo nënkupton se ai do të humbasë të gjashtë ndeshjet e Liverpoolit në muajin nëntor, përfshirë përplasjet e rëndësishme kundër Real Madridit dhe Manchester City-t, si dhe ndeshjen e Champions League kundër PSV Eindhoven-it. Skenari më i mirë është një kthim më 3 dhjetor kundër Sunderlandit, përpara sfidave të menjëhershme ndaj Leeds United dhe Interit.

Në mungesë të Frimpongut, trajneri Arne Slot do të mbështetet kryesisht te Conor Bradley, ndërsa alternativa të tjera janë përdorimi i Dominik Szoboszlait në atë pozicion dhe potencialisht Calvin Ramsay, i cili ka lënë përshtypje të mirë kohët e fundit. Megjithatë, situata nuk është ideale, pasi Frimpong ishte një nga afrimet e rëndësishme të verës dhe mungesa e tij pritet të ndikojë në stabilitetin e repartit defensiv.

Liverpooli shpreson që Bradley të mbajë ritmin dhe të qëndrojë i shëndetshëm, me synimin që Frimpong të rikthehet në kohë për periudhën e ngjeshur të ndeshjeve në fillim të dhjetorit.