Çfarë dimë për sulmin me thikë në trenin e Londrës

Pasagjerët që udhëtonin nga Doncaster drejt Londrës u sulmuan me thikë në një tren, mbrëmjen e së shtunës së datës 1 nëntor. Njëmbëdhjetë persona u plagosën dhe përfunduan në spital, dy prej të cilëve ndodhen në gjendje të rëndë për jetën.

BBC shkruan se në lidhje me këtë ngjarje, janë arrestuar dy burra britanikë në të tridhjetat, ndërkohë që policia ka njoftuar se për momentin “nuk ka asgjë që sugjeron” se bëhet fjalë për një incident terrorist.
Dëshmitarët raportuan se policia përdori një Taser ndaj një burri që mbante një thikë.

Kryeministri Keir Starmer e quajti sulmin “të tmerrshëm” dhe “jashtëzakonisht shqetësues”.

Sulmi ndodhi në trenin e linjës London North Eastern Railway (LNER), që nisej nga Doncaster, South Yorkshire, drejt stacionit King’s Cross në Londër.

Pasagjerët thanë se të paktën një person që mbante një thikë filloi të godiste njerëzit në tren pasi ai kaloi përmes Peterborough në Cambridgeshire. Policia e Cambridgeshire e mori thirrjen e parë nga pasagjerët në orën 19:39, ndërsa Policia e Transportit Britanik (BTP) u njoftua në 19:42.

Treni bëri një ndalesë të paplanifikuar në Huntingdon, që ndodhet rreth 15 minuta larg nga Peterborough me tren. Në total, incidenti zgjati rreth 10 deri në 15 minuta, dhe sipas pasagjerëve ndodhi në pjesën e pasme të trenit.

Policë të armatosur u ngjitën në bord dhe arrestuan dy burra brenda tetë minutash nga momenti i thirrjes së parë. Në vendngjarje pati edhe helikopterë mjekësorë. Pasagjerët që nuk ishin plagosur u morën në pyetje nga policia dhe disa të tjerë u dërguan me autobus drejt Londrës.

Deputeti i zonës Ben Obese-Jecty tha për BBC-në se kur mbërriti në vendin e ngjarjes rreth orës 21:00, kishte rreth 10 autoambulanca, disa makina zjarrfikëse dhe mbi 20 makina policie.

Stacioni qëndroi i mbyllur të dielën në mëngjes, po ashtu edhe rruga A1307 përpara tij.
Treni bosh ishte ende në platformë, ndërsa policia dhe ekipet e ekspertëve kriminalistikë ishin në vend.

Çfarë dimë për të dyshuarit?

Komisari John Loveless nga Policia e Transportit Britanik tha se u arrestuan dy shtetas britanikë, të moshës 32 dhe 35 vjeç, nën akuzën për vrasje të mbetur në tentativë.

Policia tha se 32-vjeçari është një britanik me ngjyrë, ndërsa 35-vjeçari është një britanik me origjinë nga Karaibet. Ata nuk janë identifikuar ende publikisht dhe po mbahen në stacione të ndryshme policie për t’u marrë në pyetje.

Ekipet e emergjencës transportuan 10 persona në spitalin Addenbrookes në Cambridge, që ndodhet rreth 30 minuta larg nga stacioni i trenit, ndërsa një person tjetër shkoi vetë për trajtim.

Rreth orës 11:00 të dielën, policia tha se dy persona ishin ende në gjendje të rëndë për jetën, ndërsa katër të tjerë kishin dalë nga spitali.
Asnjë nga të plagosurit nuk është identifikuar ende.

Çfarë kanë thënë dëshmitarët?

Dëshmitarët përshkruan panik dhe kaos, me pasagjerë që vraponin nëpër vagonë, disa prej tyre të gjakosur.

Alistair Day, 58 vjeç, tha për BBC se ishte fshehur në vagonin e bufesë me rreth 11 pasagjerë të tjerë, ndërsa sulmuesi përpiqej të hynte brenda.

Ai tha se kishte parë “një burrë që po lëvizte në mënyrë të çrregullt.” Një pasagjer iu drejtua duke i thënë se ishte therur në gjoks: “Ishte plot me gjak, kështu që i vumë presion plagës dhe e mbajtëm.”

Olly Foster tha se dëgjoi njerëz që bërtisnin “Vraponi, ka një njeri që po ther të gjithë!” dhe në fillim mendoi se ishte një shaka për Halloween.

Ai pa një burrë më të moshuar me plagë në kokë dhe qafë, pasi ai kishte bllokuar sulmuesin për të mbrojtur një vajzë të re. Pasagjerët përdorën xhaketat për t’i ndaluar gjakderdhjen.

Një tjetër dëshmitare, Wren Chambers, tha se një person ishte therur në krah dhe vrapoi nëpër tren për të paralajmëruar të tjerët, ndërsa një tjetër bërtiti: “Dikush ka një thikë!”

Disa pasagjerë u fshehën në tualete, ndërsa të tjerë vrapuan drejt pjesës së përparme të trenit.

Punonjësi i Metrosë së Londrës, Dean McFarlane, tha se pa disa njerëz që vraponin në platformë të gjakosur, me një burrë të veshur me një këmishë të bardhë që e kishte krejtësisht të mbuluar me gjak.

Një tjetër pasagjer, Steve, tha për BBC-në se një alarm u dëgjua menjëherë pasi hipi në tren në Peterborough me fëmijët e tij.
“Më pas një grua foli përmes altoparlantit dhe tha: ‘Jemi në dijeni për një incident, qëndroni të sigurt’, gjë që ishte shumë e frikshme për t’u dëgjuar.”
Ai ishte në vagonin B, ndërsa incidenti ndodhi në vagonin J.
“Është shumë e frikshme të mos dish çfarë po ndodh, dhe të jesh brenda një ‘kutie’ nga e cila nuk mund të dalësh edhe sikur të duash,” shtoi ai.

Kryeministri Keir Starmer tha se “incidenti i tmerrshëm në një tren pranë Huntingdon është jashtëzakonisht shqetësues.”

Në rrjetin X, ai shkroi: “Mendimet e mia janë me të gjithë të prekurit dhe falënderimet e mia shkojnë për shërbimet e emergjencës për reagimin e tyre.”

Ministrja e Brendshme Shabana Mahmood tha se mendimet e saj janë me viktimat, miqtë dhe familjarët e tyre, dhe vlerësoi punonjësit e emergjencës që “reaguan me profesionalizëm të lartë dhe shpëtuan jetë.”

Mbreti Charles dhe Mbretëresha Camilla shprehën “dhimbje të thellë” për ngjarjen:
“Ne ishim vërtet të tmerruar dhe të tronditur nga lajmi për sulmin e tmerrshëm me thikë që ndodhi në trenin në Cambridgeshire mbrëmë.”

Kryetarja konservatore Kemi Badenoch tha se ishte “e tmerruar” nga sulmi dhe e përgëzoi reagimin e ekipeve të emergjencës, ndërsa shtoi se duhet reflektuar “pse po shohim gjithnjë e më shumë dhunë në rrugë” pavarësisht përpjekjeve për të luftuar krimin me thika.

Kreu i Liberal Demokratëve Ed Davey vlerësoi “trimërinë e jashtëzakonshme” të pasagjerëve që mbrojtën të tjerët, ndërsa përfaqësuesi i Reform UK, Zia Yusuf, tha se njerëzit “po traumatizohen nga rritja e frikshme e krimeve me thika në vend.”

Çfarë po ndodh me shërbimet hekurudhore?

Kompania LNER u bëri thirrje pasagjerëve të kontrollojnë udhëtimet e tyre të dielën, për shkak të anulimeve apo ndryshimeve të mundshme në orare.

Biletat për të shtunën dhe të dielën do të jenë të vlefshme deri të premten, dhe udhëtarët që nuk dëshirojnë të udhëtojnë këtë javë mund të marrin rimbursim.

Linjat hekurudhore midis Hitchin dhe Peterborough janë rihapur, ndërsa trenat e Great Northern dhe Thameslink midis Londër King’s Cross dhe Peterborough do të vazhdojnë të qarkullojnë, megjithëse mund të ketë vonesa apo anulime.

Një shërbim zëvendësues me autobus është vendosur për dhe nga Huntingdon, pasi linja e trenit do të mbetet e mbyllur deri në fund të së dielës.

Ministrja e Transportit Heidi Alexander tha se pasagjerët do të shohin një “prani të dukshme policore” në stacione dhe trena gjatë ditës “për të siguruar publikun”, ndërsa ajo po merr përditësime të rregullta nga policia dhe LNER.

Burime qeveritare i thanë agjencisë së lajmeve PA se do të ketë një rritje të pranisë policore të paktën deri të martën në pikat kryesore të transportit në të gjithë Mbretërinë e Bashkuar, përfshirë Londrën, Birminghamin dhe Manchesterin, përveç Huntingdon-it.