Arnold reflekton mbi transferimin te Reali

Trent Alexander-Arnold ka filluar të përshtatet me jetën te Real Madridi, pas transferimit të tij nga Liverpooli.

Përfaqësuesi i Anglisë është kufizuar në vetëm 10 paraqitje për shkak të një dëmtimi, por kjo nuk e ka dekurajuar.

Ai është rikthyer tani, dhe megjithëse ende nuk ka luajtur që prej marrjes së lejes mjekësore, po e shijon jetën te Real Madridi në prag të një ribashkimi emocionues me ish-klubin e tij Liverpoolin në Ligën e Kampionëve të martën.

Në një intervistë për “Prime Video” (përmes MD), ai kujtoi momentin e parë kur pa emrin e tij në fanellën e bardhë të famshme në dhomën e zhveshjes së “Santiago Bernabeut”.

“Ishte një moment surreal. Të luash në një stadium kaq emblematik dhe këtë herë me ekipin vendas ishte shumë më mirë se sa si mysafir. Pse shumë më mirë? Sepse më në fund arrita të fitoj në këtë stadium”, tha ai.

Trent, i cili theksoi se “La Liga është më teknike, por më pak fizike” krahasuar me Premierligën, foli gjithashtu për Xabi Alonson, të cilin e admiroi shumë kur trajneri aktual i Real Madridit ishte ende lojtar te Liverpooli.

“Inteligjenca e Xabit, mënyra si e sheh lojën, është e pabesueshme. Jam shumë i lumtur që jam këtu, ndjej se jam pjesë e ekipit. I thashë atij se kur i shikoja atë dhe Gerrardin, kuptova që pasimi është një art. Kur ia pasonin topin njëri-tjetrit, tingëllonte ndryshe. Nuk e di nëse njerëzit do ta kuptojnë, por një pasim i mirë dallohet. Tingëllon ndryshe. Kush e di, e di”, shtoi ai.

Trent ka një mundësi të madhe për të fituar një vend të qëndrueshëm në formacionin e Real Madridit në javët në vijim, pasi Dani Carvajal do të mungojë për tre muaj për shkak të një dëmtimi në gju.

Ai mund të mos e nisë ndeshjen kundër Liverpoolit, por do të ketë shanse së shpejti.