Lautaro ‘pushton’ Europën, barazon Crespon, ‘snajperi’ i ri i Champions-it

Pas disa javësh me dyshime, Lautaro Martínez është rikthyer në qendër të vëmendjes si lideri absolut i Interit dhe një nga sulmuesit më të frikshëm të Europës.

Goli i fundit në Serie A ndaj Cremoneses, më 4 tetor, si dhe disa gabime në ndeshjet kundër Napolit, Fiorentinës e Veronës, kishin vënë në diskutim formën e tij.

Por gjithçka ndryshoi në sfidën e Champions League ndaj Kairat Almaty, ku kapiteni argjentinas zhbllokoi rezultatin me një gol tipik për stilin e tij – plot forcë, instinkt dhe vendosmëri.

Në arenën evropiane, Lautaro po shkëlqen. Ai ka realizuar një gol çdo 43 minuta, një ritëm mbresëlënës që tregon qartë diferencën mes paraqitjeve të tij në Europë dhe në kampionat.

Me 4 gola në 3 ndeshjet e para të këtij sezoni (pa përfshirë përballjen me Ajax), “El Toro” është bërë vetëm lojtari i tretë në historinë e Interit që arrin të shënojë në tri ndeshjet e para të fazës së grupeve – pas Eto’o (2010/11) dhe Adrianos (2004/05).

Sipas Corriere dello Sport, Lautaro është golashënuesi më i mirë i Champions-it në vitin 2025, me 12 gola. Me 25 gola në total në këtë kompeticion, ai ka barazuar Hernán Crespon, duke u renditur në vendin e tretë mes argjentinasve më produktivë në histori, pas Messit (129) dhe Agüeros (41).

Ky rekord e konfirmon: për Lautaro Martínez, Champions-i është skena ideale ku ai shndërrohet në një vërtet “snajper” të Europës.