Bjellorusia kërcënon të sekuestrojë mbi 1000 kamionë lituanezë me mbylljen e kufirit

Presidenti i Bjellorusisë, Aleksandr Lukashenka, kërcënoi se do të sekuestrojë mbi 1,000 kamionë lituanezë të bllokuar në vendin e tij të hënën, pas mbylljes së kufirit pas ndërhyrjeve të përsëritura nga balonat që transportonin cigare të kontrabanduara, në hapsirërn ajrore të Lituanisë.

Lituania, anëtare e NATO-s dhe Bashkimit Evropian, mbylli dy pikat kufitare me Bjellorusinë më 29 tetor, pasi balonat që fluturonin nga Bjellorusia shkaktuan ndërprerje të përsëritura të trafikut ajror në aeroportin e kryeqytetit Vilnius.

Sipas raportimeve, kufiri do të mbetet i mbyllur të paktën deri në fund të nëntorit.

Zyrtarët lituanezë thanë se ndërprerjet e fluturimeve ishin pjesë e aktiviteteve anti-perëndimore nga Bjellorusia, aleate e Rusisë, që synonin të minonin stabilitetin.

Lukashenka e denoncoi mbylljen e kufirit si një “mashtrim” dhe pjesë të një “lufte hibride” kundër vendit të tij. Ai sugjeroi që vetë Vilniusi duhet të luftojë kontrabandën e mallrave të kontrabanduara.

Autoritetet bjelloruse kanë refuzuar të hapin një korridor ekskluzivisht për evakuimin e kamionëve lituanezë të bllokuar, duke kërkuar që Lituania të rihapë plotësisht kufirin.

Lukashenka tha të hënën se deri në 1,200 kamionë lituanezë kishin ngecur në Bjellorusi për shkak të kufirit të mbyllur dhe paralajmëroi se autoritetet mund t’i sekuestrojnë ato nëse Lituania nuk arrin ta rihapë kufirin.

“Nëse nuk e bëjnë këtë brenda ditëve të ardhshme, ne do të marrim një vendim në përputhje me ligjin tonë. Deri në konfiskimin e automjeteve”, tha ai.

Sakaq, Lukashenka tha se kamionët u zhvendosën në zona parkimi me pagesë.