Qeveria britanike synon uljen e përdorimit të kafshëve në eksperimente

Qeveria britanike ka zbuluar për herë të parë planin për të realizuar premtimin e saj për uljen graduale të testimeve mbi kafshë, raporton BBC.

Plani parashikon zëvendësimin e disa testeve kryesore të sigurisë deri në fund të këtij viti dhe uljen e përdorimit të qenve dhe primatëve jo-njerëzorë në testet për mjekimet humane me të paktën 35% deri në vitin 2030.

Ministri i Shkencës, Lord Vallance, tha se mund të imagjinohet një ditë kur përdorimi i kafshëve në shkencë të jetë thuajse i eliminuar, por kjo kërkon kohë.
Eksperimentet mbi kafshët në Mbretërinë e Bashkuar arritën kulmin në 2015 me 4.14 milionë, kryesisht për modifikime gjenetike në mi dhe peshq, dhe ranë në 2.88 milionë në 2020 falë metodave alternative, por prej atëherë rënia ka ngecur. Vallance synon të rifillojë trendin në rënie duke përdorur inde kafshësh të rritura nga qelizat burimore, inteligjencë artificiale dhe simulime kompjuterike.

Plani i qeverisë parashikon që deri në fund të 2025, disa teste të sigurisë të kryhen pa kafshë, duke përdorur qeliza njerëzore, si testi i pirogjeneve tek lepujt. Nga 2026 deri në 2035, përdorimi i metodave jo-kafshë, përfshirë teknologjinë “organ-on-a-chip” dhe AI, do të përshpejtohet. Testet ndahen në dy grupe: ato që mund të zëvendësohen menjëherë sepse ekzistojnë alternativa të sigurta, dhe ato që kërkojnë zhvillim të mëtejshëm për t’u përdorur gjerësisht.

Qeveria planifikon krijimin e një Qendre për Validimin e Metodave Alternative dhe do të rrisë financimin për hulumtime, duke përfshirë 30 milion paund për një qendër kërkimore. Shoqëria Mbretërore për Parandalimin e Keqtrajtimit ndaj Kafshëve (RSPCA) e ka mirëpritur këtë hap si “përparim të rëndësishëm”, por disa shkencëtarë, si Prof Robin Lovell-Badge, shqetësohen se nxitja e shpejtë drejt alternativave mund të ketë pasoja negative për shkencën dhe mjekësinë, sidomos në biologji komplekse si studimi i trurit dhe sjelljes, që nuk mund të simulohet në laborator.