Banka e Vatikanit rikthen çiftin e pushuar nga puna për shkak të martesës

Një çift i martuar që u pushua nga Banka e Vatikanit për shkelje të një rregulli të brendshëm që ndalonte martesat midis punonjësve janë rikthyer në punë pasi kanë arritur një zgjidhje, njoftoi sindikata e punonjësve laikë të Vatikanit.

Silvia Carlucci dhe Domenico Fabiani ngritën një padi për pushim të padrejtë nga puna në janar, rreth katër muaj pasi u martuan.

Sindikata e quajti zgjidhjen një "fitore për logjikën e shëndoshë", megjithëse nuk tha se kur çifti do të kthehej në punë ose në çfarë pozicionesh.

Çifti, i cili u martua me tre fëmijë nga marrëdhëniet e mëparshme, tha se nuk e kishin menduar kurrë të anulonin dasmën e tyre më 31 gusht 2024, edhe pse mësuan për rregullin e ri, raporton KosovaPress.

Banka sugjeroi që njëri prej tyre të jepte dorëheqjen, por ata refuzuan, duke shpjeguar se nuk mund ta përballonin një veprim të tillë për shkak të detyrimeve ndaj fëmijëve, ish-bashkëshortëve dhe një kredie të re hipotekare.

Sindikata paralajmëroi se fitorja nuk ishte e plotë sepse rregulloret e Vatikanit nuk parashikojnë rimbursimin e tarifave ligjore për palën fituese.

Ajo vuri në dukje se çifti nuk kishte sigurim shoqëror gjatë periudhës kur ata luftuan për tu rikthyer në punë dhe theksoi se rregulli që çoi në shkarkimin e tyre do të shpallej jo-kushtetues në Itali.

Çifti ende nuk ka komentuar publikisht për zgjidhjen, por ata thanë se kur ngritën padinë, shpresonin për ndërhyrjen e Papa Françeskut të atëhershëm, i njohur për theksimin e rëndësisë së vlerave familjare.