Organizatori i Barcelonës lë pas dëmtimin

Lajm i shkëlqyer për Barcelonën, Pedri mund të rikthehet në fushë më shpejt se sa pritej.

Sipas AS, mesfushori spanjoll mund të kthehet që më 22 nëntor kundër Atletik Bilbao, dy javë më herët se sa pritej fillimisht. 22-vjeçari po përparon me një ritëm të mahnitshëm, aq sa stafi mjekësor po vlerëson një rifillim gradual të stërvitjes që javën e ardhshme.

Pedri dëmtoi kofshën gjatë “El Clasico” dhe fillimisht pritej të humbiste pjesën më të madhe të nëntorit, përfshirë ndeshjen kundër Atletiko Madrid dhe ndeshjen e Ligës së Kampioneve kundër Çelsit.

Megjithatë, në ditët e fundit, mesfushori ka treguar përparim të qëndrueshëm, seancat stërvitore u përfunduan pa dhimbje dhe përgjigja e tij fizike ndaj ushtrimeve ishte perfekte.

Nëse këto ndjenja pozitive konfirmohen në ditët në vijim, Hansi Flik së shpejti do të jetë në gjendje të ketë përsëri organizatorin e tij, një lojtar kyç për ekipin katalanas.

 Kthimi i Pedrit jo vetëm që forcon mesfushën, por përfaqëson edhe një rritje të moralit për të gjithë ekipin.