Gjermania blen 150 mln € armë për Ukrainën përmes nismës PURL

Gjermania do të financojë një paketë armësh prej 150 milionë eurosh për Ukrainën përmes nismës Prioritised Ukraine Requirements List (PURL), tha të premten ministri i Mbrojtjes, Boris Pistorius.

Nisma PURL u nis në korrik nga Sekretari i Përgjithshëm i NATO-s, Mark Rutte, dhe presidenti amerikan, Donald Trump, pasi Shtëpia e Bardhë kritikoi Evropën se duhej të merrte më shumë barrë për sigurinë e Ukrainës, raporton Euronews.

Marrëveshja e re financiare parashikon që 17 aleatë, kryesisht evropianë, të blejnë armë të prodhuara në SHBA, të cilat më pas do t’i transferohen Ukrainës. Synimi është të sigurohet një rrjedhë e qëndrueshme e mbështetjes vdekjeprurëse dhe jo-vdekjeprurëse, përfshirë mbrojtjen ajrore.

PURL konsiderohet thelbësor për zbatimin e angazhimit të Evropës dhe Kanadasë për të marrë pjesën kryesore të barrës për sigurinë e Ukrainës, ndërsa ajo vazhdon të mbrohet nga pushtimi i plotë rus.

Të dhënat e reja mbi ndihmën ushtarake perëndimore për Ukrainën tregojnë se ajo ka rënë me 43% në korrik dhe gusht, krahasuar me gjysmën e parë të vitit, sipas Institutit Kiel të Gjermanisë, i cili monitoron mbështetjen ushtarake dhe financiare për Kievin.

Në një postim në Instagram të premten, Pistorius tha se parlamenti gjerman ka miratuar një projektbuxhet për vitin 2026, i cili përfshin 11.5 miliardë euro mbështetje për Ukrainën vitin e ardhshëm — një rritje prej 3 miliardë eurosh.

Projekti u miratua pas një seance 15-orëshe që vazhdoi deri në orët e para të së premtes, dhe Bundestagu pritet të votojë përfundimisht mbi të më vonë këtë muaj, shtoi Pistorius.