Papa pret yjet e Hollywood-it në Vatikan, shpreh keqardhje për rënien e shikimit të filmave në kinema

Papa Leo u tha një grupi aktorësh dhe regjisorësh të njohur të Hollywood-it të shtunën se kinematë po përballen me vështirësi për të mbijetuar dhe se duhet bërë më shumë për t’i mbrojtur ato dhe për të ruajtur përvojën e përbashkët të shikimit të filmave.

Yje të ekranit si Cate Blanchett, Monica Bellucci, Chris Pine dhe Viggo Mortensen ishin ndër të ftuarit në audiencën private në Vatikan, së bashku me regjisorët e njohur Spike Lee, Gus Van Sant dhe Sally Potter.

Leo, Papa i parë amerikan, tha se kinemaja ishte një “punëtori shprese” thelbësore në një kohë pasigurie globale dhe mbingarkese digjitale.

“Kinematë po përjetojnë një rënie shqetësuese, me shumë prej tyre që po zhduken nga qytetet dhe lagjet,” shtoi ai.

“Më shumë se disa njerëz po thonë se arti i kinemasë dhe përvoja kinematografike janë në rrezik. I bëj thirrje institucioneve të mos heqin dorë, por të bashkëpunojnë për të afirmuar vlerën shoqërore dhe kulturore të kësaj veprimtarie.”

Të ardhurat nga shitja e biletave në shumë vende mbeten ende shumë nën nivelet e regjistruara para pandemisë COVID-19, me multiplekset në Shtetet e Bashkuara dhe Kanada që sapo kanë përjetuar verën e tyre më të keqe që nga viti 1981, përjashtuar mbylljen gjatë COVID-it, shkruan Reuters.