Kovaç kërkon rikthimin e formës falë kalendarit

Pas shumë ndeshjeve në transfertë, tani më shpesh në shtëpi: Borusia Dortmundi dhe trajneri Niko Kovaç po hyjnë në ndeshjet e fundit të vitit me një qëndrim pozitiv. Orari kombëtar dhe ndërkombëtar i ndeshjeve ka sjell shumë orë në autobusë, avionë dhe hotele për Dortmundin në javët e fundit.

Gjashtë nga shtatë ndeshjet e fundit kanë qenë në transfertë. Deri në Krishtlindje, megjithatë, situata do të përmbyset plotësisht: gjashtë nga tetë ndeshjet e mbetura këtë vit do të zhvillohen në Dortmund, duke filluar me përballjen kundër Shtutgartit. Çfarë do të thotë kjo për Niko Kovaç dhe skuadrën e tij?

“Kemi më pak lodhje nga udhëtimet, mund ta përdorim kohën më mirë, të kemi më shumë seanca stërvitore dhe të flem në shtratet tona,” shpjegon trajneri. Shto këtu edhe avantazhin e të luajturit në shtëpi. “Ky është një faktor i rëndësishëm,” beson Kovaç: “Është i rëndësishëm për ne, por ka pasoja edhe për kundërshtarin. Duam ta shfrytëzojmë këtë në favorin tonë duke marrë sa më shumë pikë në shtëpi për të forcuar pozitat tona në të gjitha garat.”

Freskia që jep gjumi në shtëpi dhe motivimi i tifozëve vendas duhet të ndihmojnë në neutralizimin e mungesës së lojës sulmuese së fundmi. Më pak raste shënimi, më pak gola, më pak pikë – edhe pse ndeshjet jashtë janë “një faktor”, siç thekson Kovaç, ai është autokritik:

“Mund të jemi shumë më mirë përpara. Na duhen të gjithë lojtarët, jo vetëm sulmuesit.” Bëhet fjalë për “saktësi, pasime inteligjente dhe prekje të parë të mira që të mund ta shfrytëzojmë më mirë situatën,” thotë trajneri, duke shtuar: “Po tregojmë pakujdesi në atë aspekt.”

Do të ketë rotacion, sidomos në mesfushë. Përndryshe, kroati përshkruan grupin e tij bazë që prej kohës që është në detyrë: “Gregor është gjithmonë në portë, Guirasi përpara, dhe Shloterbek e Anton luajnë në mbrojtje.”

Vetëm në qendër “është pak ndryshe,” shpjegon ai: “Nëse të gjithë janë të shëndetshëm, duhet të menaxhojmë stërvitjen dhe ndeshjet. Sepse lodhja paraqet rrezik të madh dëmtimesh.”

Të paktën lojtarëve të tij u lejohet të flen më shpesh në shtëpi.