Jerome Boateng në qendër të polemikave

Jerome Boateng vijon të përballet me reagime të forta nga tifozët. Pas protestave të mbështetësve të Bayernit, të cilët bllokuan rikthimin e tij në klub si trajner, polemikat janë zhvendosur tani në Barcelonë.

Ish-mbrojtësi gjerman ndodhej në qytetin katalanas ditët e fundit për të zhvilluar përgatitjen e nevojshme drejt marrjes së licencës së trajnerit, por prania e tij ka shkaktuar një valë pakënaqësish.

Sipas ‘Marca’-s, postimi zyrtar i klubit ku njoftohej se Boateng po kryente disa seanca trajnimi në qendrën sportive të Barcelonës është përmbytur nga reagime negative.

Një pjesë e konsiderueshme e tifozëve ka kërkuar që ai të mos lejohet të zhvillojë këto aktivitete, ashtu siç ndodhi më herët në Mynih.

Pse tifozët po protestojnë?

Rrënjët e kritikave lidhen me ngjarjet e vitit 2021, kur Boateng u përfshi në një çështje shumë të ndjeshme. Ai u akuzua se kishte kontribuar në vetëvrasjen e ish-së dashurës së tij, Kasia Lenhardt, e cila u gjet e pajetë atë vit. Po ashtu, ai u akuzua për dhunë ndaj ish-partneres dhe nënës së dy vajzave të tij.

Gjykata Rajonale e Mynihut dha një vendim në çështjen e agresionit, duke e dënuar Boateng me një gjobë prej 200 mijë eurosh me pezullim ekzekutimi.

Ndërsa ish-mbrojtësi vazhdon rrugëtimin drejt karrierës së tij të re si trajner, çështjet e së kaluarës vazhdojnë të ngjallin reagime të forta, duke e vendosur atë sërish në qendër të debatit publik.