Mbahet sot Samiti i G20 në Johanesburg, mes mungesave të mëdha dhe tensioneve për planin amerikan të paqes në Ukrainë

Samiti dyditor i Grupit të 20 ekonomive kryesore të botës ka nisur sot në Afrikën e Jugut, por aktiviteti historik, i pari i G20-s në kontinentin afrikan, është vënë në hije nga mungesa e disa prej liderëve më të rëndësishëm botërorë dhe nga debati i ndërlikuar për planin e paqes të SHBA-së për Ukrainën.

Presidenti amerikan Donald Trump, presidenti rus Vladimir Putin dhe ai kinez Xi Jinping kanë anuluar pjesëmarrjen, duke i hequr samitit një pjesë të rëndësishme të peshës diplomatike. Udhëheqësit e Meksikës dhe Argjentinës gjithashtu nuk do të marrin pjesë. Administrata Trump e ka bojkotuar plotësisht takimin, duke akuzuar qeverinë e Afrikës së Jugut për shtypjen e pronarëve të bardhë të tokave, një pretendim që Pretoria e ka cilësuar si të pavërtetë dhe të motivuar politikisht.

Përballë këtyre mungesave, pritësi i samitit, presidenti Cyril Ramaphosa, po përpiqet të zhvendosë vëmendjen tek çështjet e solidaritetit global, barazisë dhe zhvillimit të qëndrueshëm. Ramaphosa ka vendosur si prioritete lehtësimin e borxhit për ekonomitë në zhvillim, tranzicionin e drejtë energjetik, përdorimin e përgjegjshëm të metaleve të rralla, ndarjen e drejtë të barrës së mbrojtjes së klimës dhe sigurinë ushqimore.

Në prag të samitit, Sekretari i Përgjithshëm i OKB-së António Guterres u bëri thirrje vendeve anëtare të G20 të përdorin ndikimin e tyre për t’i dhënë fund konflikteve në mbarë botën, duke paralajmëruar se luftërat po shkaktojnë “vdekje, shkatërrim dhe destabilizim” në shkallë globale.

Samiti pritet të dominohet nga diskutimet mbi luftën në Ukrainë dhe ndikimin e saj ekonomik, ndërsa mungesa e udhëheqësve kyç rrezikon të kufizojë arritjen e një qëndrimi të përbashkët mbi çështjet më urgjente ndërkombëtare.