Alegri synon hakmarrjen, studion planin anti-Inter

Pas 12 vitesh, Masimil iano Alegri rikthehet të përballet me derbin e Milanos, një sfidë që ngjall emocion dhe kujtime të vjetra. Për trajnerin e Milanit, kjo përballje ka një objektiv të qartë: të harrojë humbjen e dhjetorit 2013, kur Inter fitoi 1-0 dhe kjo disfatë praktikisht shënoi shkarkimin e Alegrit një muaj më pas. Në këto vite, Alegri ka pasur kohën e duhur për të analizuar këtë duel në detaje dhe përgatitur strategjinë e tij.

Pauza e fundit e ekipeve përfaqësuese ka ardhur si bekim për Milanin, duke i dhënë trajnerit mundësinë të rikuperojë plotësisht lojtarë kyç, si Pulisiç, që tani pritet të jetë në formacion. Pas afro 100 ditësh, Alegri më në fund do të ketë në dispozicion dyshen e tij të preferuar Leao-Pulisiç, një kombinim që mund të bëjë diferencën në sulm. Megjithatë, fokusi i trajnerit këtë periudhë ka qenë te mbrojtja, një repart që ka treguar dobësi në ndeshjet e fundit.

Mungesa e Rabiot ka lënë një boshllëk para mbrojtjes, duke detyruar Alegrin të gjejë zgjidhje taktike dhe të rikthejë ekuilibrin në repartin defensiv. Në përgatitjet e fundit, Alegri ka kristalizuar formacionin anti-Inter, ku dilema e vetme lidhet me krahun e majtë të mbrojtjes. Bartesagi duket në avantazh ndaj Estupinan, por zgjedhja përfundimtare do të bëhet në ditët e fundit para derbit. Strategjia e Alegrit është e qartë: të bllokojë dyshen e Interit, Lautaro-Turam, dhe të mos lejojë që sulmuesit zikaltër të zhvillojnë lojën e tyre brenda zonës së 16 metrave.

Kjo ka qenë gjithmonë pika më e dobët e Milanit, e dukshme edhe në ndeshjet ndaj Kremoneses dhe Parmës. Një faktor që i jep besim Milanit është mbrojtja e goditjeve standarde: deri tani, skuadra e Alegrit nuk ka pësuar asnjë gol nga këto situata. Ky detaj e forcon strategjinë dhe rrit moralin e skuadrës para sfidës vendimtare. Por Inter mbetet testi më i vështirë: përballë do të kenë sulmin më të mirë në Serie A dhe lojtarë të aftë të ndryshojnë rrjedhën e ndeshjes në çdo moment.

Të ndalosh skuadrën e Kivut nuk është e lehtë, por Allegri kërkon hakmarrjen me çdo kusht. Një fitore në derbi nuk do t’i siguronte vetëm kënaqësinë e hakmarrjes së ftohtë, por gjithashtu mund të ndihmonte Milanin të ngritej në krye të Serie A. Trajneri italian e di se ky është momenti për të treguar përvojën dhe strategjinë e tij, duke u siguruar që skuadra të jetë e përqendruar dhe e vendosur nga minuta e parë deri në të fundit. Pas një periudhe intensive analizash dhe rikuperimesh, Alegri dhe Milan janë gati për derbin, me besimin se përgatitja e kujdesshme dhe planifikimi taktiko-strategjik mund të bëjnë diferencën në një sfidë historike që gjithmonë ngjall pasion.