Bologna ‘fluturon’ drejt play-off-it me një fitore bindëse ndaj Salzburgut

Bologna e Vincenzo Italianos shënoi një nga paraqitjet më mbresëlënëse të sezonit, duke mposhtur Salzburgun me rezultatin e thellë 4-1 në “Dall’Ara”, në ndeshjen e pestë të fazës së kampionatit në Europa League.

Me këtë triumf, skuadra kuqeblu ngjitet në vendin e 18-të dhe hedh një hap të rëndësishëm drejt playoff-it.

Që nga minutat e para, Bologna imponoi ritmin dhe agresivitetin, duke krijuar raste të shumta për gol. Avantazhi erdhi në minutën e 26-të, kur Odgaard finalizoi një aksion të shpejtë dhe të saktë.

Reagimi i Salzburgut erdhi shpejt: Vertessen barazoi në minutën e 33-të, duke mbajtur gjallë shpresat e austriakëve.

Por pjesa e dytë tregoi fytyrën e vërtetë të Bologna-s. Vetëm dy minuta mjaftuan që ndeshja të merrte tjetër kahje:

Dallinga shënoi në minutën e 51-të, ndërsa Bernardeschi dyfishoi menjëherë në të 53-ën, duke e çuar rezultatin në 3-1 dhe duke thyer çdo rezistencë të Salzburgut. Në minutën e 86-të, Orsolini vuri vulën e një mbrëmjeje perfekte me golin e katërt.

Bologna tashmë ka tri finale të vogla përpara: përballjet me Celta Vigo, Celtic dhe Maccabi, që do të jenë vendimtare për të siguruar minimalisht pjesëmarrjen në ndeshjet e playoff-it. Performanca kundër Salzburgut, megjithatë, tregon se skuadra e Italianos është më e gatshme se kurrë për të luftuar deri në fund.