Detajet e dosjes, zbulohet shkaku i arrestimit të Mogherinit dhe 2 të tjerëve në Belgjikë! Tenderi për të cilin akuzohen

Autoritetet belge kanë kryer tre arrestime deri më tani, njëri prej të cilëve është Federica Mogherini, ish-nënkryetare e Komisionit Evropian.

Ky zhvillim vjen pas bastisjeve nga autoritetet në selinë e Shërbimit Evropian të Veprimit të Jashtëm (EEAS) në Bruksel dhe në ndërtesat e Kolegjit të Evropës në Bruges, si pjesë e një hetimi nga Zyra e Prokurorit Publik Evropian mbi mashtrime të mundshme në përdorimin e fondeve të BE-së.

Sipas njoftimit të Zyrës së Prokurorit Publik Evropian, hetimet kanë të bëjnë me një rast mashtrimi të mundshëm që lidhet me përdorimin e fondeve të Bashkimit Evropian. U arrestuan gjithsej tre persona. Dy të tjerët janë një menaxher i Kolegjit të Evropës dhe diplomati italian Stefano Sannino, ish-Sekretar i Përgjithshëm i EEAS për periudhën 2021-2025.

Veprat penale të raportuara kanë të bëjnë me periudhën 2021-2022. Veprat që po hetohen përfshijnë mashtrim në dhënien e kontratave publike, korrupsion, konflikt interesi dhe shkelje të sekretit profesional.

Autoritetet hetuese po hetojnë nëse Kolegji i Evropës ose drejtuesit e tij kishin njohuri paraprake për kushtet e një tenderi publik për financimin e Akademisë së re Diplomatike Evropiane në Bruges. Institucioni, i cili u themelua në vitin 1949 dhe konsiderohet si një “inkubator” i zyrtarëve evropianë, bleu një ndërtesë në Spanjaardstraat në vitin 2022 për të pritur pjesëmarrësit në program, në një kohë presioni financiar, pak para se EEAS të lëshonte një thirrje për financim që përfundoi duke i dhënë asaj 654,000 euro, informon media “Le Soir”.

Hetimi përqendrohet në mundësinë e aksesit në informacion konfidencial në lidhje me tenderin, i cili supozohej të mbetej sekret në mënyrë që të sigurohej trajtim i barabartë i organizatave kandidate. Përpara se dosja t’i përcillej EPPO-së, OLAF kishte intervistuar individët e përfshirë. Deri më tani, nuk ka asnjë tregues se EPPO ose OLAF kanë arritur në përfundimin se është kryer ndonjë shkelje dhe asnjë nga të arrestuarit nuk është akuzuar zyrtarisht, shkruan italiania “La Repubblica”.  Rasti shton presion të mëtejshëm mbi Kolegjin e Evropës dhe administratën e tij, pasi Mogherini – e cila filloi mandatin e saj të dytë në Bruges këtë vit – nuk iu përgjigj pyetjeve të mediave evropiane në lidhje me hetimin.

Në operacion u përfshi policia belge e Flandrës Perëndimore dhe Zyra Evropiane Kundër Mashtrimit (OLAF), si pjesë e një hetimi nga Zyra e Prokurorit Publik Evropian (EPPO). Përfaqësuesit e EPPO-së dhe OLAF-it refuzuan të komentojnë.

Kolegji i Evropës dhe Akademia e re Diplomatike Evropiane drejtohen nga Mogherini, e cila shërbeu si Përfaqësuese e Lartë e BE-së për Politikën e Jashtme nga viti 2014 deri në vitin 2019, mori detyrën e Rektores së Kolegjit në vitin 2020 dhe ka qenë drejtoreshë e Akademisë që nga krijimi i saj në vitin 2022. Në kohën e hetimit, EEAS drejtohej nga Josep Borrell, një ish-Ministër i Jashtëm spanjoll. Një zëdhënës i Borrell nuk ishte i disponueshëm për koment, ndërsa Kolegji i Evropës, EEAS dhe prokurorët belgë gjithashtu refuzuan të komentonin.

Zyra e Prokurorit Publik Evropian (EPPO) , e cila zyrtarisht u bë operacionale në vitin 2021, është një organ i pavarur i BE-së përgjegjës për luftimin e mashtrimit kundër buxhetit të Unionit dhe çdo krimi tjetër që prek interesat e tij financiare, duke përfshirë korrupsionin, pastrimin e parave dhe mashtrimin ndërkufitar me TVSH-në.

Ky autoritet mbikombëtar ka fuqinë jo vetëm për të hetuar, por edhe për të ndjekur penalisht dhe për t’i sjellë ata përgjegjës para drejtësisë, një fuqi që më parë nuk e kishte, ndër të tjera, Zyra Evropiane Kundër Mashtrimit (OLAF).