Son shantazhohet për “shtatzëni të rreme”, dy persona përfundojnë në burg

Një grua dhe një burrë janë dënuar në Seul për shantazh ndaj futbollistit të njohur jugkorean, Son Heung-min, i cili aktualisht luan për Los Angeles FC. Gjykata dënoi 20-vjeçaren Yang me katër vjet burg dhe ish-të dashurin e saj 40-vjeçar, Yong, me dy vjet burg.

Sipas hetimeve, gruaja i kishte dërguar Son-it një fotografi ultratingulli duke pretenduar se ishte shtatzënë me fëmijën e tij dhe e kërcënoi se do ta bënte publik rastin. Ajo arriti të marrë 300 milionë won (mbi 175,000 euro) nga futbollisti në qershor të vitit të kaluar, raporton agjencia e lajmeve “Yonhap”

Më vonë, nga marsi deri në maj të këtij viti, Yang dhe Yong u përpoqën së bashku të merrnin edhe 70 milionë won të tjerë, duke kërcënuar se do të njoftonin familjen dhe mediat për shtatzëninë e supozuar dhe një abort të pretenduar.

Gjykata i shpalli fajtorë për shantazh dhe tentativë shantazhi, duke theksuar se akuzat kundër Son-it ishin të sajuara dhe të përdorura për përfitim financiar.