Mauro Icardi i ofrohet Milanit për një transferim në janar

Qendërsulmuesi argjentinas i Galatasarayt, Mauro Icardi, thuhet se i është ofruar Milanit për t’u transferuar gjatë merkatos së janarit.

Icardi po shqyrton mundësinë e largimit pasi humbi rolin titullar ndaj Victor Osimhen.

Por, kjo nuk e ka penguar atë të tregojë cilësinë e tij, duke shënuar shtatë gola në 14 ndeshje në ligë.

Gazetari italian, Matteo Moretto, pretendon se Milanit i është ofruar mundësia për të nënshkruar me sulmuesin e Galatasarayt, Mauro Icardi, në janar.

Kuqezinjtë u interesuan për disponueshmërinë e ish-yllit të Interit në verën e vitit 2024 dhe mund të kenë një shans për ta transferuar tani.

Gjigantët italianë janë të etur të shtojnë më shumë fuqi sulmi për shkak të performancave të dobëta të Santiago Gimenez dhe Christopher Nkunku.

Kontrata e Icardit skadon verën e ardhshme dhe një marrëveshje mes klubeve mund të jetë e lehtë.