Liverpool në garë me gjigantët europianë

Liverpool po përballet me konkurrencë të fortë nga disa prej klubeve më të mëdha të Europës për transferimin e yllit të Bayern Munich, Michael Olise.

Sulmuesi 24-vjeçar ka shpërthyer në nivelin më të lartë që nga transferimi i tij te Bayern vitin e kaluar, duke u shndërruar në një nga lojtarët më vendimtarë të skuadrës bavareze.

Në sezonin e tij të parë në Allianz Arena, Olise regjistroi 35 kontribute në gola në të gjitha garat, ndërsa në Kupën e Botës për Klube realizoi 3 gola dhe 2 asistime në 5 ndeshje.

Forma e shkëlqyer ka vazhduar edhe këtë sezon, ku Olise ka shënuar 9 gola dhe 11 asistime në 23 paraqitje, duke ndihmuar Bayern të kryesojë Bundesligën dhe të garojë në të gjitha frontet.

Performancat e tij i kanë siguruar gjithashtu një vend të qëndrueshëm në kombëtaren e Francës, me të cilën ka kontribuar në kualifikimin për Kupën e Botës verën e ardhshme.

Sipas raportimeve, Liverpool e sheh Olise si pasardhës afatgjatë të Mohamed Salah, ndërsa trajneri Arne Slot konsiderohet një admirues i madh i francezit. Klubi nga Anfield mund të bëjë një lëvizje konkrete qoftë në janar, qoftë në afatin veror.

Megjithatë, operacioni nuk pritet të jetë i lehtë. Manchester City, Arsenal, Chelsea dhe madje edhe Real Madrid janë të interesuar për Olise. Madrilenët po shqyrtojnë një ristrukturim të sulmit, që mund të përfshijë largimin e Vinicius Junior, Rodrygo dhe Endrick.

Vlera e Olise vlerësohet rreth 114 milionë paund, ndërsa ai ka kontratë me Bayern Munich deri në vitin 2029, çka do të thotë se klubi gjerman nuk ka presion për ta shitur. Liverpool do të duhet të paraqesë një ofertë shumë bindëse për ta sjellë yllin francez në Anfield.

Olise aktivizohet kryesisht si anësor i djathtë, por mund të luajë edhe si mesfushor ofensiv, dhe konsiderohet tashmë si një nga sulmuesit më të mirë në futbollin europian.