Silva mbyll kapitullin me Fluminense, Milani mbetet një ëndërr

Aventura e Thiago Silvas në Brazil ka përfunduar më herët se sa pritej. Mbrojtësi 41-vjeçar dhe Fluminense janë ndarë zyrtarisht me marrëveshje të përbashkët, gjashtë muaj para skadimit të kontratës së tij. Largimi u formalizua të martën pasdite në qendrën stërvitore të klubit në Rio de Janeiro.

Pavarësisht moshës, Thiago Silva nuk ka ndërmend të tërhiqet nga futbolli. Synimi i tij është një rikthim në Evropë, ku dëshiron të luajë në një kampionat konkurrues dhe të mbajë gjallë shpresat për një thirrje të mundshme në kombëtaren e Brazilit për Kupën e Botës së ardhshme.

Emri i Milanit, klubi ku ai u bë një nga mbrojtësit më të mirë në botë, përmendet si një dëshirë e madhe e lojtarit, edhe pse një rikthim në San Siro duket i vështirë për shkak të politikës aktuale të klubit.

Fluminense i dha lamtumirën kapitenit të tij me fjalë mirënjohjeje, duke kujtuar kontributin e madh të tij. Në dy periudha me fanellën trengjyrëshe, Thiago Silva regjistroi 212 paraqitje dhe 19 gola, duke fituar Kupën e Brazilit dhe duke lënë një trashëgimi të rëndësishme në historinë e klubit.