Ukrainasit shkatërruan aeroplanët ushtarakë rusë në vlerë 70 milionë dollarë

Dronët me rreze të gjatë veprimi të Qendrës Speciale "Alfa" të Shërbimit të Sigurisë së Ukrainës (SBU) kryen një sulm në aeroportin ushtarak rus Belbek në Krimenë e pushtuar.

Dy avionë luftarakë Su-27 u goditën në sulmin e mbrëmshëm, njoftoi sot shërbimi për shtyp i SBU-së, shkruan Pravda, përcjell KosovaPress.

"Një nga aeroplanët ishte në pistë me një komplet të plotë luftimi dhe gati për tu ngritur. U shkatërrua. Vlera e vlerësuar e të dy aeroplanëve është rreth 70 milionë dollarë amerikanë. Përveç kësaj, u konfirmua dëmtimi i kullës së kontrollit, gjë që mund të ndërlikojë organizimin dhe kontrollin e fluturimeve në aeroport," njoftoi SBU.

Ky është sulmi i dytë në aeroportin Belbek, pasi një ditë më parë dronët e SBU-së në të njëjtin aeroport shkatërruan pajisje ushtarake ruse në vlerë qindra-miliona dollarë: dy radarë Nebo-SVU, një radar 92N6 nga sistemi S-400 Triumf, një sistem antiajror Pancir-S2 dhe një avion MiG-31.