Kur do të mësohet pasardhësi i Deschampsit te Franca?

Do të duhet të presim të paktën deri këtë verë për të mësuar se kush do të jetë trajneri i ardhshëm i Francës.

Didier Deschamps do të largohet nga posti i tij në përfundim të Kupës së Botës dhe deri atëherë nuk do të dihet se kush do ta zëvendësojë.

Këtë e ka konfirmuar presidenti i Federatës Franceze të Futbollit (FFF), Philippe Diallo.

Ai thekson se është e rëndësishme të mos ketë shumë shpërqendrime brenda ekipit, në mënyrë që lojtarët të fokusohen te objektivi kryesor: fitimi i titullit të tretë botëror.

Për këtë arsye, opsioni i tij i parë është që pasardhësi i Deschamps të emërohet vetëm pasi të përfundojë fushata e Kupës së Botës për “Les Bleus”.

Ka spekulime të shumta se trajneri i ri do të jetë Zinedine Zidane, i cili nuk ka qenë në pankinë që nga largimi i tij i dytë nga Real Madridi në vitin 2021. Deschamps ka qenë në krye të përfaqësueses franceze që nga viti 2012.

Ky njoftim i Diallo sinjalizon një qasje ndryshe nga situatat e mëparshme.

Në vitin 2010, Laurent Blanc ishte konfirmuar si pasardhës i Raymond Domenech që para fillimit të Kupës së Botës.

Franca u eliminua në fazën e grupeve në mënyrë turpëruese, duke grumbulluar vetëm një pikë.

Ata bënë bujë edhe për bojkotimin e stërvitjeve dhe grevën pas ndeshjes së fundit të grupit kundër Afrikës së Jugut.

Franca do ta nisë rrugëtimin e saj drejt Kupës së Botës 2026 më 16 qershor kundër Senegalit, i cili i kishte befasuar si kampionë në fuqi në ndeshjen hapëse të Botërorit 2002.

Ndeshja e fundit e grupit për Francën do të jetë kundër Norvegjisë më 26 qershor.