Rusia intensifikon sulmet në Odesa, rrezikohet infrastruktura detare e Ukrainës

Rusia ka shtuar ndjeshëm sulmet ndaj rajonit jugor ukrainas të Odesës, duke shkaktuar ndërprerje të gjera të energjisë elektrike dhe duke kërcënuar seriozisht infrastrukturën detare të zonës, raporton BBC.

Zëvendëskryeministri i Ukrainës, Oleksiy Kuleba, deklaroi se Moska po kryen sulme “sistematikisht” ndaj rajonit, duke paralajmëruar se fokusi i luftës mund të jetë zhvendosur drejt Odesës.

Presidenti Volodymyr Zelensky tha se sulmet e përsëritura synojnë të bllokojnë aksesin e Ukrainës në logjistikën detare, një element kyç për ekonominë dhe eksportet e vendit.

Në fillim të dhjetorit, presidenti rus Vladimir Putin kishte kërcënuar se do t’i ndërpriste Ukrainës daljen në det, si hakmarrje për sulmet me dronë ndaj cisternave të ashtuquajturës “flotë hije” të Rusisë në Detin e Zi. Ky term përdoret për qindra anije cisternë që Rusia i shfrytëzon për të shmangur sanksionet perëndimore të vendosura pas pushtimit të plotë të Ukrainës në vitin 2022.

Të hënën në mbrëmje, sulmet goditën infrastrukturën portuale në Odesa, duke dëmtuar edhe një anije civile, sipas guvernatorit rajonal.