Juventusi gjen identitetin e humbur

Juventusi duket më në fund një skuadër e vërtetë, me ide të qarta dhe një identitet të dallueshëm në fushë.

Pas një periudhe të gjatë pasigurie dhe rezultatesh të paqëndrueshme, ardhja e Luçiano Spaletit ka sjellë një kthesë të rëndësishme, si në lojë ashtu edhe në rezultate.

Renditja flet qartë: bardhezinjtë janë vetëm pak pikë larg kreut dhe, për herë të parë këtë sezon, ambicia për titull nuk duket më një iluzion.

Pas disa ndeshjeve të para ku trajneri pranoi vështirësi dhe gabime, Juventusi ka reaguar fuqishëm. Fitoret kundër kundërshtarëve direktë si Bolonja dhe Roma, si edhe paraqitjet bindëse në Europë, kanë rritur besimin në grup dhe te tifozët.

Skuadra duket më e sigurt, më kompakte dhe më e vetëdijshme për atë që kërkon të bëjë në fushë. Spaleti ka zgjedhur të mos e përmbysë gjithçka. Ai ka ruajtur skemën bazë 3-4-2-1, por ka ndërhyrë në mënyrën e interpretimit të roleve dhe në lëvizjen kolektive. Juventusi tani ndërton lojën me më shumë qetësi, del më mirë nga presioni dhe shfrytëzon më me zgjuarsi krahët e fushës.

Lojtarë si Kambiaso dhe MekKeni janë kthyer në elementë kyç, duke alternuar pozicionet dhe duke krijuar epërsi numerike në zonat vendimtare. Një tjetër element i rëndësishëm është fleksibiliteti taktik.

Skuadra di të ndryshojë ritëm gjatë ndeshjes, të mbrojë me rend dhe të sulmojë me ide të qarta. Golat e shënuar në javët e fundit janë rezultat i skemave të punuara dhe jo thjesht i episodëve individualë.

Kalendari i ardhshëm ofron ndeshje në letër të përballueshme, një mundësi ideale për të vazhduar ngjitjen dhe për të konsoliduar pozicionin në krye. Nëse kjo rritje konfirmohet, Juventusi mund të kthehet realisht në një pretendues serioz për titullin. Spaleti po korr frytet e punës së tij dhe Juventusi, pas shumë kohësh, duket se ka gjetur sërish shpirtin e një skuadre fituese.