Ish-sulmuesi gjerman vlerëson blerjen e re të Milanit

Oliver Bierhoff ka vlerësuar pozitivisht afrimin e Niclas Fullkrug te Milani, duke e cilësuar si një sulmues që i përshtatet kërkesave taktike të skuadrës. Në një intervistë, ish-sulmuesi kuqezi ka analizuar pikat e forta, kufizimet dhe ndikimin që gjermani mund të ketë në garën për Champions.

Oliver Bierhoff, ish-sulmuesi gjerman i Milanit dhe protagonist i titullit kampion të sezonit 1998/1999, ka promovuar hapur afrimin e Niclas Fullkrug në radhët e kuqezinjve.

Në një intervistë për Gazzetta dello Sport, Bierhoff e përshkroi sulmuesin gjerman si një “nëntësh” klasik, një qendërsulmues të stilit të vjetër që mund të jetë shumë i dobishëm në një sistem loje që kërkon një pikë reference në sulm.

Sipas tij, forca kryesore e Fullkrug qëndron te loja me shpinë nga porta dhe prania konstante në zonë, veçanërisht kur skuadra e kërkon me krosime nga krahët.

Bierhoff theksoi aftësinë e tij në lojën ajrore, falë kohës së saktë dhe intuitës për të paraprirë mbrojtësin, si dhe cilësitë teknike dhe karakterin luftarak, duke nënvizuar se nuk dorëzohet kurrë në fushë.

Ish-sulmuesi kuqezi nuk i anashkaloi as kufizimet e Fullkrug, duke sqaruar se ai nuk është një lojtar i shpejtë dhe nuk duhet përdorur për të sulmuar hapësirat apo për të udhëhequr kundërsulmet.

Megjithatë, sipas Bierhoff, kjo nuk e zbeh rolin e tij në grup, përkundrazi, Fullkrug është një lojtar me personalitet, që di të flasë kur duhet dhe që shokët e skuadrës e dëgjojnë, një lider me përvojë.

Ai kujtoi gjithashtu se e njeh prej vitesh sulmuesin gjerman, që nga koha e kombëtares U21, duke pranuar se karriera e tij nuk ishte lineare, por potenciali ishte gjithmonë i dukshëm.

Duke folur për ndikimin te Milani, Bierhoff shprehu shpresën që Fullkrug të ndihmojë skuadrën edhe në garën për Champions, duke shtuar se Massimiliano Allegri ka gjetur sulmuesin që kërkonte: një lojtar që krijon hapësira, imponon praninë në zonë dhe sheh portën.

Ai e vlerësoi gjithashtu Allegrin si një trajner me përvojë dhe mentalitet fitues.