FC Liria të rikthehet tek rezultatet që i dëshiron publiku

Opinioni publik në Prizren, kur flitet për sportin (pavarësisht sukseseve të KB Bashkimi, në të dy konkurrencat, që janë për lakmi) veçmas për futbollin, sy e mendje i ka te Klubi Liria.

Tradita 90-të vjeçare, bënë që vëmendja dhe interesi i publikut të sillet tek dhe rreth Lirisë, pavarësisht statusit juridik.

Ka kohë që Liria (nga viti 2023) është privatizuar, e në ndërkohë me 2024 riprivatizuar (shitur apo stërshitur te disa aksionar), por pavarësisht kësaj, klubi s’po gjen qetësinë.

Liria, për herë të fundit është bërë kampion në vitin e largët 1995 (30-të vite më parë), në kohën e sakrificës, ku emrat si: Mirsad Çollaku, Astrit Berisha, Ergjan Dana, Nehari Toska, Ali Maralusha, Genc Tamniku, Ilir Bytyqi, Sami Buqaj, Ismail Berisha, Alev Nush, Bekim Bakaj, Nurtin Çolak, etj. ishin jo vetëm pjesë e lavdisë së asaj kohe të vështirë segregacioni por që dhanë edhe spektakël e kënaqësi, në fushë në ato vite.

Pas luftës Liria, dy herë fitoi titullin (Kupa e Kosovës 2006 dhe 2010) por që qëndrueshmëri s’pati duke rënë nga elita (Superliga) e futbollit të Kosovës, e duke u rikthyer në elitë, por pa patur stabilitet.

Nga 2008-2013 Klubi u administrua nga Kompania ‘Drini”, qe riktheu fillimisht statusin e skuadrës elitare, fitoi dhe Kupën e Kosovës, 2010 por që më pas shkaku i problemeve financiare, klubi u rikthye tek Komuna.
Vitit 2015 deri më 2018 kohë kur Klubi drejtohej nga disa ish futbollistët e sakrificës, në krye me Mirsad Çollakun, pati stabilitetin në Superligë dhe Liria ishte konkurruese.

Madje, në edicionin 2017/2018, kur klubi drejtohej nga z. Mirsad Çollaku, kryetar i klubit atëherë (aktualisht kryetar i LRF-së dhe anëtar i KE të FFK-së), Liria kishte prekur pothuaj Evropën (pas pranimit në UEFA e FIFA), por që pengesë qe ‘futja e duarve të politikës’ në klub dhe pengimi i këtij suksesi.

Ndërkohë, klubi u privatizua por ai s’po gjen rrugën e suksesit dhe po përpëlitet në rangun e dytë. Urojmë që në pranverë të rikthehet tek rezultatet që i dëshiron publiku.

Privatizimi që u bë si u bë (herë tjetër për te) nuk zgjidhi asnjë telashe, pos asaj financiare. Organizimi profesional, është në fazë dëshirore!

Ndërkohë, problem në vetë mbetet Shkolla e Futbollit, që dikur njihej si Akademia e Lirisë. Emri, Akademi është “përdorur e keqpërdorur” nga ‘ekspertë’ të ndryshëm që veç të tillë s’ishin kurrë.

Vitit 2014/2015 mbetet si viti i artë për Shkollën e Futbollit, kur pas një kohe të gjatë nxori hiq më pak  9-të Juniorë që ishin anëtarë të kombëttares së Kosovës dhe Shqipërisë.

Suksesi i dedikohet në radhë të parë trajnerëve Agron Beseni e Enis Gashi, që me modesti flasin për atë kohë.
Emrat si: Flamur Gashi, Ilir Mustafa, Lumbardh Dellova, Almir Kryeziu, Fitim Susuri, Albin Memaj, Ibrahim Gavazaj,Ardian Gashi, Roni Gashi, (pjesë e kombëtareve të Kosovës), Diellor Beseni e Zenel Gavazaj (të Kombëtares së Shqipërisë) në grupmoshat U-17 e U-19, i takojnë historisë, të kaluarës së lavdishme të këtyre trajnerëve e futbollistëve.

Disa nga ta janë sot duke bërë karrierë si Dellova (Bullgari) Kryeziu (Ballkani), Mustafa (Drita) etj.

Nga atëherë e nuk ka ndonjë përfaqësim në grupmoshat e Kosovës e as të Shqipërisë!

Tash e 10-të vite Shkolla e Futbollit Lirisë, ka vend numëruar. Madje Kadetët dhe Juniorët e saj, tash e tre vite janë pjesë e rangjeve më të ulëta , kadetët bëjnë gara në LRF të Prizrenit.

Ndërsa,  Juniorët në  Ligën e Parë, për dallim që këta dikur shkundinin Superligën dhe tmerronin skuadrat me lojë e gola.

Eksperimentet e shumta, me ndërrimin e trajnerëve bashkë me statusin juridik të klubit, u treguan të kundër efektshme.

Ndërsa, kemi të bëjmë me një klub puro privat nga 2023 dhe më pas me aksionar nga 2024, Liria dhe interesi i saj mbetet publik.

Liria, ka qenë brend në vete që nga vitet 70-ta.

Interesi institucional (pa marrë parasysh spektrin politik) duhet të kthejë vëmendjen në rimëkëmbjen e klubit dhe sidomos Shkollës së Futbollit, për t’i kthyer namin Lirisë dhe për të nxjerrë futbollistë, që vitet e fundit kanë munguar.

Duhet kthyer koha e lavdisë e të lartpërmendurve, bashkë me yllin e Mallorcas dhe Kombëtares, Vedat Muriqi (I shndërruar tash në legjendë të gjallë), Lumbardh Dellovës etj.