I dërguan 7 mln euro Hamasit përmes organizatave të bamirësisë, goditet grupi në Itali; arrestohen 9 persona

Autoritetet italiane kanë arrestuar 9 persona të lidhur me tre organizata bamirëse, pasi dyshohet se kanë mbledhur miliona euro fonde për grupin militant palestinez Hamas.

Sipas mediave italiane, prokurorët e antiterrorizmit thonë se, të dyshuarit akuzohen se kanë dërguar rreth 7 milionë euro (8.2 milionë dollarë) tek shoqatat me seli në Gaza, territoret palestineze ose Izrael, në pronësi, të kontrolluara ose të lidhura me Hamasin.

Prokurorët thanë se, midis të arrestuarve ishte Mohammad Hannoun, president i Shoqatës Palestineze në Itali, duke e përshkruar atë si kreun e qelizës italiane të organizatës Hamas.

Bashkimi Evropian e ka përfshirë Hamasin në listën e organizatave terroriste.

Sipas prokurorëve italianë, të cilët bashkëpunuan me vendet e tjera të BE-së në hetim, fondet e paligjshme u dorëzuan përmes operacioneve të trekëndëzimit nëpërmjet transfertave bankare ose nëpërmjet organizatave me seli jashtë vendit te shoqatat me seli në Gaza, të cilat janë shpallur të paligjshme nga Izraeli për lidhjet e tyre me Hamasin.

Ministri i Brendshëm Matteo Piantedosi shkroi në X se hiqeshin si iniciativa në favor të popullsisë palestineze, teksa fshihnin mbështetjen dhe pjesëmarrjen në organizatat terroriste.

Nuk pati komente të menjëhershme nga të dyshuarit ose shoqatat.

Në janar të vitit 2022, Këshilli Evropian vendosi të zgjasë masat kufizuese ekzistuese kundër 12 individëve dhe tre subjekteve që mbështesin financimin e Hamasit dhe Xhihadit Islamik Palestinez.