Polonia planifikon fortifikime kundër dronëve

Polonia planifikon të investojë më shumë se dy miliardë euro në ndërtimin e fortifikimeve të përparuara kundër dronëve përgjatë kufijve të saj lindorë, me të gjithë sistemin që pritet të përfundojë brenda dy viteve.

Ky veprim vjen si një përgjigje e drejtpërdrejtë ndaj ndërhyrjes masive të dronëve rusë në hapësirën ajrore polake në fillim të këtij viti, gjë që rriti ndjenjën e kërcënimit në vend.

Një zyrtar i lartë i mbrojtjes konfirmoi një afat kohor ambicioz për projektin, i cili duhet të forcojë ndjeshëm mbrojtjen e krahut lindor të Evropës, shkruan Guardian, transmeton KosovaPress.

Zëvendësministri i Mbrojtjes, Cezary Tomczyk, zbuloi detajet e sistemit të ri të mbrojtjes në një intervistë në Varshavë.

"Ne presim që të kemi aftësitë e para të sistemit në rreth gjashtë muaj, ndoshta edhe më herët. Dhe i gjithë sistemi do të përfundojë në 24 muaj", tha Tomczyk.

Ai shpjegoi se si sistemet e reja do të integrohen me linjën e vjetër të mbrojtjes të ndërtuar një dekadë më parë dhe do të përfshijnë shtresa të shumëfishta mbrojtjeje - nga mitraloza, topa dhe raketa deri te sistemet e bllokimit të dronëve.

Projekti me vlerë mbi dy miliardë euro do të financohet kryesisht me fonde evropiane përmes programit të kredisë për mbrojtjen SAFE (Veprimi i Sigurisë për Evropën), me kontribute nga buxheti shtetëror polak.

Shkaku për përshpejtimin e planeve ishte një incident në shtator, kur dhjetëra dronësh të dyshimtë rusë hynë në hapësirën ajrore polake. Kjo çoi në mbylljen e aeroporteve, ngritjen e avionëve luftarakë dhe kur dronët u rrëzuan, ndërtesat në tokë u dëmtuan gjithashtu.

Përveç murit kundër dronëve, Polonia po forcon gjithashtu kufijtë e saj tokësorë me Bjellorusinë dhe enklavën ruse të Kaliningradit si pjesë e projektit "Mburoja Lindore".