Njihuni me Flossie-n/ 30 vjeçe, thyen rekordin “Guinness” si macja më e moshuar në botë

Flossie, një mace britanike shtëpiake me qime të shkurtra, ka mbushur 30 vjeçe, duke thyer rekordin botëror “Guinness” si macja më e moshuar në botë, sipas “New York Post”.

E lindur më 29 dhjetor 1995, Flossie arriti ditëlindjen historike në vitin 2025, duke u renditur në librin e rekordeve.

Mosha e saj u verifikua zyrtarisht nga “Guinness World Records” në nëntor 2022, kur u konfirmua të ishte 26 vjeçe e 316 ditë.

Në atë kohë, mosha e saj vlerësohej të ishte ekuivalente me rreth 120 vite njerëzore.

Jeta e hershme e Flossie filloi pranë spitalit “Saint Helens” në Merseyside, Angli, ku ajo u shpëtua kur ishte ende një kotele.

Gjatë viteve, ajo jetoi me disa pronarë përpara se të binte përfundimisht nën kujdesin e organizatës bamirëse britanike për mirëqenien e kafshëve “Cats Protection”.

Në vitin 2022, “Cats Protection” mundësoi që Flossie të adoptohej nga Victoria Green, e cila jeton në Orpington, Angli.

Organizata bamirëse punoi ngushtë me veterinerët për të verifikuar datën e lindjes së Flossie duke përdorur të dhëna historike, dhe duke i mundësuar “Guinness World Records” të certifikonte zyrtarisht moshën e saj.

Në kohën e konfirmimit të rekordit të saj, “Guinness World Records” vuri re se Flossie ishte e shurdhër dhe kishte shikim të kufizuar.

Pavarësisht këtyre problemeve që lidhen me moshën, ajo konsiderohej me shëndet të mirë.

Organizata tha se ajo mbante një rutinë të qëndrueshme ditore që përfshinte vakte të rregullta, periudha të gjata gjumi dhe lojëra të lehta.

Flossie njihet aktualisht si “macja më e vjetër e gjallë në botë”  dhe renditet ndër shtatë macet më të vjetra të verifikuara në historinë e “Guinness”

Ndërsa macet e tjera, përfshirë Creme Puff, janë dokumentuar se kanë jetuar më gjatë në të kaluarën, Flossie mbetet macja më e vjetër e konfirmuar që është gjallë sot.