Martini ul tonet

Vllaznia po kalon një periudhë ku ndryshimi nuk vërehet vetëm në fushën e lojës, por edhe në mënyrën se si klubi po sillet jashtë saj, veçanërisht në raport me mediat.

Daljet publike të kuqebluve tashmë janë dukshëm më të matura dhe më të kontrolluara, një sinjal i qartë se shkodranët kanë reflektuar mbi gabimet e së shkuarës dhe kanë nxjerrë mësimet e duhura.

Për shumë kohë, kuqeblutë ishin shpesh në qendër të vëmendjes për deklarata të forta, premtime të bujshme apo polemika të panevojshme.

 Në fazën e parë të kampionatit, zërat nga brenda klubit kuqeblu shpesh krijuan bujë mediatike, por ajo që u tha jashtë fushe nuk u përkthye gjithmonë në paraqitje pozitive brenda saj.

Përkundrazi, shumë prej atyre deklaratave u kthyen në një “bumerang”, duke shtuar presionin mbi skuadrën dhe duke ndikuar negativisht në performancë.

Vllaznia e atyre javëve vuajti dukshëm në fushën e lojës. Rezultatet nuk ishin në lartësinë e pritshmërive, ndërsa çdo hap fals shoqërohej me rikthimin e fjalëve të thëna më parë. Në vend që të ndihmonin, ato deklarata shërbyen si barrë shtesë për lojtarët dhe stafin teknik, duke krijuar një ambient jo gjithmonë të shëndetshëm për punë. Por viti 2026 duket se ka sjellë një qasje tjetër në kampin shkodran.

Sot, fokusi është zhvendosur qartësisht nga fjalët te puna, nga titujt mediatikë te përqendrimi maksimal në fushën e lojës.

Një shembull domethënës ishte edhe fitorja e rëndësishme ndaj Egnatias, ku pavarësisht peshës së suksesit, deklaratat pas ndeshjes ishin të matura dhe larg euforisë. Trajneri Martini u shfaq i qetë dhe i përmbajtur në intervistën e tij pas takimit, duke shmangur çdo deklaratë të nxituar apo provokuese.

Ai vlerësoi punën e skuadrës, por njëkohësisht theksoi se rruga është ende e gjatë dhe se çdo ndeshje kërkon përqendrim maksimal.

Një mesazh i qartë se Vllaznia nuk dëshiron më të “fitojë” ndeshje në media, por vetëm në fushë.

Në këtë frymë, klubi ka vendosur të limitojë edhe daljet në konferenca zyrtare para ndeshjeve.

Çdo komunikim është i menduar dhe i filtruar, duke synuar të ulë presionin dhe të ruajë qetësinë brenda grupit.

Edhe përballja e radhës ndaj Dinamos po përgatitet në heshtje, larg zhurmës mediatike dhe deklaratave bombastike.

Në fund, kjo qasje e re tregon një Vllazni më të pjekur, më të ndërgjegjshme dhe më pragmatiste.

Shkodranët duket se e kanë kuptuar se suksesi ndërtohet me punë, disiplinë dhe përulësi, ndërsa fjalët e mëdha lihen mënjanë. Tashmë, gjithçka i besohet fushës së lojës, aty ku Vllaznia synon të flasë me rezultate.