Putin lë ukrainasit në errësirë dhe në ngricë, tani synon centralet bërthamore, duke filluar nga Çernobili

Vladimir Putin po e zhyt Ukrainën në terr dhe në të ftohtë akull. Me termometrat që natën tregojnë -14 gradë dhe të gjitha impiantet termoelektrike të bombarduara, ka mbetur vetëm një burim drite që rusët po përpiqen ta errësojnë me çdo kusht: centralet bërthamore.

Ata shmangin goditjen direkte, por bombardojnë me raketa dhe dronë infrastrukturat që i lidhin me rrjetin elektrik. Një operacion me rrezik të lartë që kërcënon edhe Çernobilin, ku ndodhet sarkofagu që ruan “përbindëshin” radioaktiv të katastrofës së 40 viteve më parë dhe depozitat e karburantit të tre reaktorëve tashmë të fikur.

Sulmi i kësaj nate u përqendrua mbi këto objektiva me 34 raketa (balistike, hipersonike, cruise) dhe 339 dronë Shahed-Geran. Niveli i alarmit u theksua nga një komunikatë e Rafael Grossi-t,  që është drejtor i përgjithshëm i AIEA-s, Agjencisë Ndërkombëtare për Energjinë Atomike: “Disa nënstacione elektrike ukrainase, jetike për sigurinë bërthamore, janë goditur dhe centrali bërthamor i ChNpp (Çernobil) ka humbur gjithë energjinë elektrike të jashtme, ndërsa edhe linjat e tjera të centraleve bërthamore janë sulmuar. AIEA po monitoron aktivisht zhvillimet për të vlerësuar ndikimin mbi sigurinë.”

Sulmi ndaj centraleve atomike

Sulmi u përqendrua te nënstacionet që lidhin me rrjetin dy centrale atomike, një në zonën perëndimore dhe tjetri në jug. Situata është shumë e rrezikshme, sepse detyron reaktorët në ndryshime të menjëhershme të fuqisë: nuk mund të prodhohet energji që nuk shpërndahet. Normalisht, aktivitetet për uljen e gjeneratorëve në minimum, duke ndërhyrë mbi shufrat e uraniumit, planifikohen me kohë. Tani vendosen dhe realizohen sipas ritmit të raketave të Putinit. Mungesa e lidhjeve të jashtme e vështirëson funksionimin e aparateve emergjente. Çdo problem duhet menaxhuar nën sulmet e vazhdueshme nga qielli.

Vitaliy Zaichenko, drejtues i Ukrenergo që menaxhon rrjetin energjetik, përpiqet të japë një vizion pozitiv: “Rusët nuk patën sukses, ia dolëm ne”, deklaroi për Kyiv Independent, duke theksuar se mbrojtja rreth këtyre nyjeve strategjike është “efektive” dhe ka lejuar kufizimin e dëmeve.

Kriza e mbrojtjes ajrore të Kievit

Në realitet, i gjithë sistemi elektrik është një hap larg kolapsit. Përveç centraleve bërthamore, vendi mbështetet vetëm te importet nga Polonia dhe Rumania. Por prej dy muajsh, inkursionet shkatërrojnë shtylla, kabina, nënstacione. Kur arrijnë të riparohen, sulmohen sërish. Shpesh rusët lëshojnë raketa mbi të njëjtin objekt brenda dhjetë minutash: breshëria e dytë ndërpret punën e zjarrfikësve që nuk arrijnë të shuajnë flakët. Janë shkatërruar turbinat hidrike, ato me gaz, madje edhe ato diellore dhe të biogazit.

Fakti që sulmet me dronë dhe raketa ndodhin në mes të ditës, dhe jo më natën, tregon krizën e mbrojtjes ajrore, e cila prej korrikut merr municione me pikatore nga Perëndimi.

“Çdo paketë ndihme është jetike”, ka shkruar presidenti Zelensky. Ai shtoi: “Kemi nevojë dramatike për raketa Patriot, Nasam dhe bateri të tjera tokë-ajër.”

Në ngricë dhe pa dritë

Situata në Kiev po bëhet e papërballueshme. Energjia është e racionuar prej më shumë se një muaji, ndërsa temperaturat janë polare. Nëse deri javën e kaluar garantoheshin 9–12 orë dritë, tani mezi arrihet në 6 orë. Rihapja e shkollave pas pushimeve të Krishtlindjes u shty për më 1 shkurt për të kursyer energji dhe ngrohje. Dtek, operatori kryesor privat, shpjegoi se sulmi i mëngjesit la 335 mijë apartamente pa dritë në kryeqytet. Brenda dy orëve u arrit të rikthehej furnizimi për 162 mijë banesa; 173 mijë të tjera mbetën në errësirë. Plot 5 mijë e 635 pallate janë pa ngrohje: 46% e ndërtesave po ngrijnë. Dymbëdhjetë ndërtesa të mëdha apartamentesh nuk kanë ngrohje prej 11 ditësh: tubacionet ngrijnë natën dhe shpërthejnë duke përmbytur tërë katet. Presioni i ujit është minimal në të gjitha lagjet perëndimore të metropolit: në katet e larta duhet përdorur bidonë.

Kushtet në kryeqytet nuk janë përjashtim. Bombardimet e mëngjesit kanë shtuar ndërprerjet edhe në rajonet e Odesës, Dnipropetrovskit, Sumyt, Rivnes dhe Kharkivit. Kjo ofensivë kundër popullsisë civile ka shkatërruar përditshmërinë që ukrainasit kishin ruajtur deri tani, duke mbajtur një ritëm normal jete pavarësisht luftës. Tani shkuarja në punë është bërë sfidë, sepse tramvajet janë ndalur në shumë qytete, ndërsa zyrat e fabrikat nuk kanë energji. Në disa supermarkete raftet janë bosh, pasi njerëzit kanë bërë rezerva nga frika e më të keqes.

Vetë Zelensky paralajmëroi: “Rusët duan të arrijnë të lënë qytetet në errësirë për tre deri pesë ditë rresht.” Një errësirë kolosale për të thyer krenarinë dhe vendosmërinë e një vendi që lufton prej tre vitesh e njëmbëdhjetë muajsh.

Shkrim nga La Repubblica