Arbeloa mbron Viniciusin

Trajneri i Real Madridit, Alvaro Arbeloa, e ka marrë fitoren 6-1 ndaj AS Monacos si dëshmi se skuadra e tij ka nevojë për mbështetjen e tifozëve në “Santiago Bernabeu”, pas një debutimi bindës për të në Ligën e Kampionëve.

“Los Blancos” u ngjitën në kuotën e 15 pikëve me pesë fitore nga shtatë ndeshje dhe u shfaqën në formë shumë të mirë, pas fishkëllimave që kishin marrë nga tifozët të shtunën ndaj Levantes.

Ylli i mbrëmjes ishte pa dyshim Vinicius Junior, i cili e mbylli ndeshjen me tre asistime dhe një gol. Arbeloa e quajti këtë një “natë perfekte” për të. U ngritën disa pikëpyetje kur Vinicius nuk festoi me tifozët, por vrapoi për të përqafuar Arbeloan pas golit të shënuar.

“Ajo që po thoja është pikërisht ajo që pamë sot: kur ai është i lumtur, është lojtari që e çrregullon më shumë mbrojtjen kundërshtare.

Ne kemi nevojë për të. Jam shumë i lumtur për të dhe ai e meriton. Përqafimi i tij është një përqafim për gjithë Real Madridin, një përqafim nga shokët e skuadrës dhe mbështetja e ‘Bernabeut’. Ne ia kemi treguar mbështetjen në momentet e vështira.

Ka qenë një natë perfekte për të dhe për të gjithë në ‘Bernabeu’. I thashë të njëjtën gjë që po e them edhe këtu: kam nevojë që ai të jetë i lumtur dhe ta shijojë lojën, dhe ai ka mbështetjen time të plotë dhe është pothuajse i detyruar të tregojë gjithë futbollin që është i aftë të luajë”, tha ai për Marca.

Ai shtoi se merita duhet t’u takojë si tifozëve, ashtu edhe lojtarëve, duke theksuar se mbështetja e publikut u reflektua në paraqitjen e skuadrës në fushë.

“Kjo është një fitore e lojtarëve, u përket djemve, medaljet janë për ta dhe për publikun e ‘Bernabeut’.

Nëse duam të fitojmë trofe, kemi nevojë për ta. Mendoj se sonte u tregua se Real Madridi është më i fortë kur ‘Bernabeu’ është në anën e tij. Shumë prej nesh e kanë përjetuar këtë dhe e dimë çfarë do të thotë ‘Bernabeu’. Jam shumë i lumtur.”

Një nga pikëpyetjet kryesore rreth Viniciusit dhe Mbappesë nën drejtimin e Xabi Alonsos ishte angazhimi i tyre në fazën mbrojtëse. Arbeloa theksoi se nuk dëshiron që ata të shpenzojnë energji duke presuar vazhdimisht.

“Sa herë që skuadra është kompakte, ata janë të parët që ushtrojnë presion. Mendoj se si Kylian, ashtu edhe Vini po bëjnë përpjekje, por nuk dua t’ju gënjej: nuk mendoj se ata duhet të lodhen duke ndjekur lojën pas mesfushorëve; i dua të freskët.”

Sa i përket fillimit të tij si trajner, Arbeloa u shpreh se lojtarët e kanë kuptuar thelbin e Real Madridit.

“Jam mirë, faleminderit të gjithëve. U bëra trajner për t’i ndihmuar lojtarët dhe për të nxjerrë më të mirën nga secili prej tyre. Kam nevojë që ata të jenë të lumtur dhe në këtë mënyrë do të mund të luftojmë për gjithçka.”

“(Lojtarët) më kanë pritur ngrohtësisht dhe po më ndihmojnë. Ata e kuptojnë në mënyrë perfekte se çfarë përfaqëson Real Madridi. Real Madridi është pasion, karakter, tifozë dhe punë e palodhur.”

Ndërkohë, Arbeloa pritet ta ketë sërish në dispozicion Brahim Diazin pas angazhimit me kombëtaren, pas humbjes së dhimbshme të penalltisë në finale që u fitua nga Senegali. Arbeloa tha se Brahimi ishte një nga arsyet kryesore pse Maroku arriti deri aty.

“Ai ka zhvilluar një turne të jashtëzakonshëm dhe nëse arritën në finale, kjo është kryesisht falë tij. Mezi pres ta përqafoj; është një djalë shumë i aftë dhe mund të përshtatet në disa pozicione. Edhe shokët e skuadrës mezi presin ta përqafojnë.”

“Los Blancos” këtë fundjavë udhëtojnë në “La Ceramica” për t’u përballur me Villarrealin, ku do të kenë mundësinë të rikthehen në krye të tabelës para se Barcelona të luajë të dielën. Arbeloa do të synojë fitoren e tretë radhazi..