Manchester Utd planifikon biseda me Bruno Fernandesin

Sipas raporteve të ESPN, Manchester United po planifikon të zhvillojë biseda me kapitenin Bruno Fernandes me qëllim që ta bindë të qëndrojë në klub edhe pas përfundimit të Botërorit 2026.

Shefat e klubit pritet t’i komunikojnë mesfushorit portugez se dëshirojnë që ai të qëndrojë të paktën edhe një vit tjetër pas verës, kur përfundon turneu më i madh ndërkombëtar. Kontrata aktuale e Fernandes me United skadon në vitin 2027.

Megjithatë, interesimi nga klubet e Saudi Pro League, i cili u rikthye pas tentativës së Al Hilal verën e kaluar, pritet të vazhdojë.

Manchester United do të respektojë vendimin e futbollistit, por preferon ta mbajë, ndaj drejtuesit u habitën nga deklarata e tij se ndjeu që klubi dëshironte ta largonte atë gjatë verës së kaluar.

Për të shmangur keqkuptime të mëtejshme, United kërkon që Bruno të shprehet qartë për planet e tij para Botërorit, në mënyrë që klubi të mund të planifikojë strategjinë e ardhshme.