PSG vendos kufij për Dembelen?

Ousmane Dembéle po përballet me një nga momentet më delikate që nga transferimi i tij te Paris Saint-Germain.

Klubi parisien ka nisur zyrtarisht kontaktet për rinovimin e kontratës së sulmuesit francez, por mesazhi ka qenë i qartë dhe i prerë: nuk do të pranohen kërkesa financiare jashtë parametrave të tregut dhe projektit sportiv.

PSG dëshiron ta bëjë Dembelen një nga shtyllat kryesore të skuadrës për vitet në vijim, por pa cenuar ekuilibrin ekonomik që drejtuesit po përpiqen të vendosin pas viteve të shpenzimeve të pakontrolluara.

Bisedimet ndodhen ende në një fazë fillestare dhe të dyja palët kanë shprehur gatishmëri për të arritur një marrëveshje, por aspekti financiar pritet të jetë pika më e ndjeshme e negociatave.

Drejtuesit e PSG-së nuk duan të përsërisin gabimet e së kaluarës dhe kanë vendosur një “vijë të kuqe” të qartë sa i përket pagave dhe bonuseve.

Modeli i ri që klubi synon të zbatojë bazohet në paga fikse të kontrolluara dhe shpërblime të lidhura ngushtë me performancën sportive dhe objektivat kolektive.

Kjo qasje nuk përputhet plotësisht me pritshmëritë e rrethit të Dembeles, i cili thuhet se ka kërkuar një rritje të ndjeshme, i mbështetur në paraqitjet shumë pozitive dhe sezonin e fundit mbresëlënës.

Megjithatë, presidenti Nasser Al-Khelaifi ka qenë i prerë: askush nuk është mbi projektin.

Që nga ardhja në vitin 2023, Dembélé ka përjetuar një rikthim të fortë, ka gjetur vazhdimësi në Ligue 1 dhe ka lënë pas problemet fizike.

Tani mbetet të shihet nëse ai do të pranojë filozofinë e re të PSG-së apo negociatat do të zgjasin më shumë se sa pritej.