Stuhia Chandra shkakton përmbytje dhe probleme udhëtimi në Mbretërinë e Bashkuar

Stuhia Chandra, stuhia e tretë e emëruar për këtë vit, ka vazhduar të shkaktojë përmbytje dhe probleme udhëtimi në Mbretërinë e Bashkuar, me erë të fortë dhe shi të dendur gjatë të martës.

Disa dhjetëra paralajmërime për përmbytje, ku pritet përmbytje, dhe mbi 200 paralajmërime të tjera, ku përmbytja është e mundur, janë në fuqi në të gjithë vendin. Sipas BBC, banorët e një kompleksi banimi në Dorset janë udhëzuar të evakuohen menjëherë për shkak të rrezikut serioz për jetën nga përmbytjet e lumit Stour, transmeton KosovaPress.

Në Somerset është shpallur një incident i madh pas përmbytjes që goditi rreth 50 shtëpi, ndërsa disa rrugë lokale dhe tetë shkolla janë mbyllur. Meteorologët paralajmërojnë se reshjet e shiut do të vazhdojnë edhe të enjten dhe të premten, duke rritur rrezikun për përmbytje të reja në jugperëndim të Anglisë.

Shërbimi hekurudhor kombëtar ka paralajmëruar se kushtet e këqija të motit mund të ndikojnë në udhëtimet deri të premten në Angli, Skoci dhe Uells. Në Irlandën e Veriut, mbi 10,000 shtëpi mbetën pa energji elektrike dhe mbi 300 shkolla u mbyllën. Erërat e forta arritën shpejtësi deri në 80 mph në Ards Peninsula.

Stuhia Chandra erdhi vetëm pak ditë pas Stuhisë Ingrid, duke goditur tokën tashmë të ngopur me shi. Në pjesë të Skocisë veriore, moti i lagësht dhe i erëshëm do të vazhdojë, ndërsa reshje bore mund të bien mbi 200 metra lartësi në Pennines dhe Uplands Jugore, duke krijuar kushte të vështira për udhëtim.

Kjo është stuhia e tretë e madhe që godet Mbretërinë e Bashkuar në janar, pas Ingrid dhe Goretti, e cila u konsiderua nga Met Office si një nga më të fuqishmet në 30-35 vitet e fundit në Cornwall dhe Ishujt e Scilly.