Paralajmërimi i BE-së: Rusia ka intensifikuar bombardimet, synon nënshtrimin e Ukrainës

Duke mbërritur për takimin e ministrave të Jashtëm të BE-së në Bruksel, shefja e politikës së jashtme të bllokut, Kaja Kallas, tha se ata kishin një “axhendë shumë të paketuar” pasi “rendi ndërkombëtar i bazuar në rregulla mbetet nën presion”.

Ajo tha se ministrat do të diskutojnë, ndër të tjera, marrëdhëniet në zhvillim BE-SHBA, luftën e Rusisë në Ukrainë dhe Lindjen e Mesme.

Për sa i përket Ukrainës, ajo tha se delegacioni rus në bisedimet me Emiratet e Bashkuara Arabe vazhdoi të përfaqësonte vetëm personelin ushtarak, “pa mandat për të rënë dakord për asgjë”, duke vënë në pikëpyetje nëse Rusia është vërtet e përkushtuar ndaj procesit të paqes.

“Ata po bombardojnë ukrainasit, po përpiqen t’i bombardojnë dhe t’i ngrijnë që të dorëzohen, dhe për këtë arsye po diskutojmë edhe mbështetjen energjetike që mund t’u japim, sepse është dimër shumë i vështirë dhe ukrainasit po vuajnë vërtet. Një katastrofë humanitare po vjen atje”, tha ajo.

Ajo shtoi se shqetësimi im është se kemi parë shumë lëshime edhe nga pala ukrainase, por kjo po e turbullon pamjen, sepse Ukraina nuk është ajo që po bën agresionin. Është Rusia ajo që po e bën këtë.

“Pra, ne duhet të ushtrojmë më shumë presion mbi Rusinë në mënyrë që të shohim lëshime nga pala ruse", shtoi ajo.

Kallas gjithashtu minimizoi idenë e “një ushtrie evropiane”, duke thënë se ajo mbetej një domen për autoritetet dhe hierarkitë kombëtare.

“Në ushtri duhet të kesh një zinxhir komande shumë të drejtpërdrejtë dhe të kuptueshëm, në mënyrë që sa herë që ndodh diçka, të jetë e qartë se kush i jep urdhra kujt. Nëse krijojmë struktura paralele, atëherë kjo thjesht do ta turbullojë pamjen”, tha ajo.

Në Lindjen e Mesme, tema kryesore është situata në Iran, me një diskutim mbi listimin e Gardës Revolucionare të Iranit në listën e terrorizmit të BE-së, "duke i vendosur ata në të njëjtën pozitë me Al Kaedën, Hamasin, ISIS-in " .