Dështon plani për Goretzkan

Atletico Madrid është detyruar të shqyrtojë alternativa të tjera për Leon Goretzka, me vetëm katër ditë të mbetura deri në mbylljen e afatit kalimtar, pasi mesfushori i Bayern Munich refuzoi një transferim te Metropolitano këtë dimër. Drejtori sportiv Mateu Alemany kishte udhëtuar të hënën drejt Mynihut për bisedime, por ato përfunduan pa sukses.

“Los Colchoneros” i kishin ofruar Bayern Munichut një shumë prej 2–3 milionë eurosh, si dhe ishin të gatshëm të mbulonin pagën e lojtarit për pjesën e mbetur të sezonit. Mendohej se Goretzka ishte i interesuar për këtë lëvizje, por tani është tërhequr, gjë që u konfirmua nga drejtori sportiv i Bayern-it, Max Eberl, për Fabrizio Romano.

Sipas Marca, Atletico mund të mbetet ende i interesuar për Goretzka-n në verë, kur ai do të ishte lojtar i lirë, por në atë rast do të përballet me konkurrencë nga Tottenham Hotspur dhe AC Milan.

Ky zhvillim e ka shtyrë Atletico Madridin të kthehet drejt opsioneve të tjera, me Diego Simeonen që kërkon me ngulm përforcime. Matteo Moretto shpjegon se Atletico ka pyetur për mesfushorin e Interit, Davide Frattesi, dhe po shqyrton mundësinë e një huazimi me opsion blerjeje, por në garë janë edhe Nottingham Forest dhe Lazio.

Ndërkohë, Atletico e konsideron shumë të shtrenjtë Joao Gomes të Wolves, i vlerësuar në 45 milionë euro, ndërsa për Ederson dos Santos të Atalantës do të duhej që klubi italian të ulte kërkesën prej 40 milionë eurosh. Megjithatë, Atletico ka qenë sërish në kontakt me La Dea për brazilianin.

Bisedimet me Atalantën kanë përfshirë edhe emrin e Ademola Lookman, të cilin Atletico tentoi ta transferonte gjatë verës. Sipas Cadena SER, “Los Colchoneros” kanë rifilluar kontaktet për Lookman, i cili mbetet një nga objektivat kryesorë ofensivë, ndërsa në garë për të është edhe Fenerbahçe.

Emra të tjerë që Alemany ka shqyrtuar janë Kang-In Lee i Paris Saint-Germain dhe Igor Jesus i Nottingham Forest, por klubi francez ka përjashtuar mundësinë e largimit të koreano-jugorit para verës.