Fitore e çmendur në frymën e fundit për Lazion

Lazio arriti një fitore dramatike 3-2 ndaj Genoas në “Olimpico”, falë një penalltie në minutën e 100-të, pas një ndeshjeje me dy fytyra.

Pjesa e parë ishte e vakët dhe pak raste të pastra, me të dyja skuadrat të kujdesshme.

Gjithçka ndryshoi në pjesën e dytë. Në minutën e 56-të, Pedro shënoi nga pika e bardhë për 1-0, pas ndërhyrjes së VAR-it.

Lazio shfrytëzoi momentin dhe në të 62-tën Taylor dyfishoi shifrat me golin e tij të parë në Serie A.

Genoa reagoi dhe ngushtoi diferencën me penalltinë e Malinovskyi-t (67’), për të barazuar më pas 2-2 në minutën e 75-të me Vitinha, pas një goditjeje këndi.

Kur gjithçka dukej e mbyllur, në minutën e 100-të VAR-i akordoi një tjetër penallti për Lazion, të cilën Danilo Cataldi e shndërroi në gol, duke i dhënë bardhekaltërve një fitore të çmendur dhe jetike në frymën e fundit.