Lajme të mira për Interin, përpara derbit ndaj Juventusit

Lajme të mira për Interin kanë dalë para Derby d’Italia të së shtunës ndaj Juventusit, pasi Nicolò Barella dhe Hakan Çalhanoglu janë rikthyer në stërvitje.

Nerazzurrët janë në formë të shkëlqyer këtë periudhë dhe po kryesojnë bindshëm tabelën, pavarësisht se kanë munguar gjysma e mesfushës titullare.

Denzel Dumfries është ende jashtë pas operacionit në kyçin e këmbës, por sot pati një zhvillim të rëndësishëm, pasi Barella dhe Çalhanoglu u kthyen në stërvitje.

Mesfushori turk kishte munguar që prej momentit kur u detyrua të largohej i dëmtuar gjatë ndeshjes me Napolin, duke pësuar një tërheqje në muskulin soleus të këmbës së majtë më 11 janar.

Sa i përket Barellës, ai pësoi një lëndim në kofshën e djathtë gjatë stërvitjes përpara udhëtimit në Champions League ndaj Borussia Dortmund më 28 janar.

Është më e mundshme që italiani të rikthehet direkt në formacionin titullar, ndërsa Piotr Zielinski pritet të mbajë frenat e mesfushës dhe të nisë nga minuta e parë në këtë ndeshje të madhe të fundjavës.